حلقة النهاردة مهمة جدا لان هجاوب فيها علي اسئلة كتير محيرة للناس جدا
و هي بخصوص دهانات الحوائط و طلاء الجدران
كتير مش عارفين يختاروها ازاي طيب ننسق ايه مع ايه ياباشمهندس احمد
طب السيراميك و لا الدهانات الاول طب العفش و لا الدهانات الاول و غيره و غيره
و كمان حلقة انهارده مميزة للناس الي بتحب الهدوء و الراحة في الألوانو مش بتحب تعمل كل غرفة بلون مختلف و حابة تعمل الشقة كلها لون واحد بس مش عارفة ايه هو
هجاوبكم انهارده علي معظم الاسئلة الي بتتكرر مع الدهانات
Intro
هنتكلم انهارده عن 3 الوان مهمة اوي لو انت من الناس الي بتحب توحد لون الشقة و مش كل غرفة بلون مختلف
و من ألاوان المفضلة لنقاشة الشقة بالكامل و يحسسك بوسع الشقة او الالفيلا او الوحدة السكنية بتاعتك وما بيكونش مؤذي للعين هو
1:الفانيلا لاتيه
و ده طبعا من ألالوان المحببة لينا كلنا و هو حاجة كده بين الكافيه و البيج
2:التوايلايت
و ده بقي نقدر نقول عليه رمادي فاتح اوي بس مش واصل للأبيض للناس الي بتحب فخامة الرمادي و هو من أفتح درجات الرمادي و الي بيحسس بوسع واضح للمكان
3:السمر سنو
وده قريب لليمستون ممكن يكون افتح منه شوية و لكن هو من الدرجات الغامقة شوية لكنه تريند الفترة دي مع الفانيلا لاتيه و التوايلايت و تحسه ما بينهم كده بيج واخد حته رمادي
هنتكلم بالتفصيل عن كل ألوان الدهانات دي و يمشوا مع ايه من الفرش و الديكورات و غيره و لكن هجاوبكم الاول علي شوية اسئلة محيراكم
و من أشهر و أهم ألاسئلة الي بتسألهااختار الدهانات الأول و لا العفش الأول؟
من رأي انك لازمتوفق الدهانات و الديكورات الي عندك في التصميم او في شقتك عموما مع بعض من الاول
مش العكس لانك ممكن تتجه مثلا ناحية الدهانات البيج و تعمل الديكور علي الاساس ده لأنك حابب البيجات و بعد كده يعجبك عفش مش هيبقي احلي حاجة مع البيجات و كان هيبقي محتاج الوان دهانات رمادي زي الاصفر الكناري بيكون رائع مع الرمادي عكس البيج
ليه لما بختار لون من الكارتلة و انفذه في الموقع ممكن ميطلعش نفس الدرجة بالظبط او بحسه مختلف
لان الأضاءة بتغير اللون بشكل كبير انت ممكن تدهن شقتك كلها لون واحد و لكن الاضاءة مختلفة في كل غرفة عن التانية فتحس ان الدهان مختلف
فزي مابقولكوا علي طول لازم تأخد عينة ألاول من اللون الي عجبك و تجربه في الانحاءالمختلفة في الشقة
السؤال الشهير جدا بقا
اعمل الشقة كلها لون واحد و لا اعمل حائط مختلف ولا كل غرفة لون
ايه اشيك
تعالي اقولك علي حاجة لو انت من الناس الي بتحب التغيير بشكل دائم بين ديكورات الغرف ادهن كل غرفة بلون خاص بيها
اما لو كنت من الناس الي بتحب البساطة و ما عندكش مشكل في انك هتمل بعد كده و هتبقي عايز التغيير فادهن الشقة كلها لون واحد
بس في الحلقة دي هنتكلم عن توحيد لون الدهانات في الشقة كلها او الوحدة السكنية بتاعتك و ازاي تنسقها مع الديكورات و الفرش
اول لون هنبدا بيه هو الفانيلا لاتيه
طبعا اللون ده غني عن التعريف و اتكلمنا عنه قبل كده في حلقة لوحده و ده من اكتر الالوان الي انا شخصيا بفضلها بشكل كبير لو حابب تعمل الوحدة السكنية كلها بلون واحد
و سبب تميزه انه بيتماشي مع معظم الازواق و الديكورات
و نقدر نستخدم معاه اكتر من لون في العفش زي النبيتي و الكاشمير و الازرق و الاخضر و الجراي و غيره من ألالوان
و ياسلام بقا لو عملته ربع لمعة بيكون هادئ و فخم جدا و تقدرتستخدم معاه الاستانلس الجولد في الديكورات و المرايات و توزيعاتها المختلفة
اللون ده تمييزه هيحسسك بشياكة المكان مهما استخدمت معاه من ديكورات
و ألارضيات ممكن تبقي علي بيجات لو المكان عندك ضيق شوية لان ده هيساعدك تحس بوسع المكان او كافيهات و بني لو عندك متسع من المساحة
و لو حابب كمان ممكن تعمل حيطة او اتنين في الشقة بالشكل القطيفة من نفس لون الفانيلا لاتيه بس هتغمق درجتين عشان تبقي الحيطة مميزة وواضحة و هتكون بنفس الدرجة فمش هتخرج اوي عن توحيد اللون للشقة كلها
تاني لون عندنا هو التوايلايت
وده بيتميز انه لون محايد و بيليق عليه ألوان كتير فتقدر تدهن بيه الوحدة السكنية كاملة و تغير في الوان العفش في كل غرفة و هيليق معاهم كلهم زي الروز و البيبي بلو و الاصفر الكناري و الاخضر الملكي و كمان الابيض بس او الاسود بس وبيكون شيك جدا لو حابب تعمل جزء من العفش اسود لان في ناس كتير بتفضله او ان يكون ابيض سادة
و تقدر تلعب بشوية ديكورات زي الاباليك باللون الاسود او الفضي او حتي الجولد و هتتماشي جدا مع الديكور العام
اما الارضيات فتقدر تخليها اما رمادي غامق مشبح بابيض مثلا او انها ممكن تكون رمادي فاتح لو المكان ضيق فهتحس بأتساع المكان جدا و ممكن أبيض مشبع بأسود
و كمان تقدر تعمل سيراميك بشكل الباركيه سواء بلون فاتح او غامق بيكون شيك جدا
وايا كان شكل الديكور تقدر تكمل جمال المكان بشوية براويز باللون ألابيض و كمان البانوهات الي انا شخصيا بفضلها جدا
و مع الأضاءات المختلفة و الليدات هتحس بتغيير كبير في كل غرفة
اما بالنسبة لتالت و اخر لون معانا فهو السمر سنو
و ده بفضله في المساحات الواسعة شوية لانه من الدهانات الي تعتبر غامقة فممكن لو المكان ضيق او صغير و دهنته يضيق المكان أكثر
و من أكثر ألوان العفش الي بتليق معاه بشكل كبيرهو الأزرق بدرجاته وأي شكل أرضية بيتماشي معاه سواء بورسليين أو سيراميك أو باريكه و لكن انا بافضل الأرضيات البيج الفاتح معاه بتظهروا جدا و بتبين جماله
و عشان تبين جماله كمان هتزود بعض الديكورات من الزرع الكبير الاخضر بيفرق جدا في الشكل و بيظهر جمال اللون
و كمان من الألوان المميزة معاه في العفش الكافيه الغامق بيكون في منتهي الشياكة و تحس بدفئ في المكان و هدوء و خصوصا لو ضفت بعض التفاصيل باللون الابيض زي البراويز و الفازات و التحف
و بكده نكون وصلنا لنهاية حلقتنا انهارده و يارب تكونوا استفادتوا كان معاكم احمد هلال مهندس ديكور و معماري و كنتوا بتتفرجوا علي قناة A.H designs
________________________________________________________________________
4 авг 2022
