Ўзбек элининг қаҳрамонига олмон эли ҳайкал ўрнатган.
Бугун замонавий тўмарисларнинг ОЛДИ-10 талигида исмлари келтирилган қаҳрамон аёлларимизга ҳайкал ўрнатиш, албатта, қийин иш. Лекин улардан марҳумларини яхши сўзлар билан эслаш, тирикларини эса тириклигида қадрлаш қийин иш бўлмаса керак.
Биз нима қилаяпмиз?
Биз ёнимиздаги тўмарсиларимизни ўзимиз қадрламаганимиз етмаганидек, уларга қарши уюштирилаётган туҳмат ва ҳақоратларга ҳам сукут сақлаяпмиз. Уларнинг ҳимоясига бир оғиз гап айтишга ҳам қўрқаяпмиз.
Биз бисотимиздаги яхши сўзларни қаҳрамонларимиз ўлгандан кейингина айта оламиз. Биз тирикларга ҳам эҳтиром кўрсатамиз, агар улардан бизга фойда бўлса. Агар тириклар амал, бойлик ёки бошқача қудрат соҳиби бўлишса.
Агар тирикнинг амали ёки бойлиги бўлмаса, у қаҳрамонларнинг қаҳрамони бўлса ҳам, биз уни қадрламаймиз. Биз шундай фойдакор, прагматик халқмиз. Биз уйимизга меҳмонга ҳам бизга фойдаси тегадиган одамларни чақирамиз ва ўзимизни “меҳмондўст миллат”, дейишни яхши кўрамиз.
Ўз элида юзлаб ва минглаб қаҳрамонлар бўлатуриб, бошқа элларнинг онда-сонда чиқиб қоладиган бир ёки икки қаҳрамонини ардоқлайдиган, ўзга элларнинг қаҳрамонларига ҳавас қиладиган ягона миллат ўзбек миллати бўлса керак.
Нима учун биз шундай миллатмиз, биласизми?
Чунки биз оқни қорадан, одамни ҳайвондан, мусулмонни кофирдан, хуллас, ҳақни ботилдан ажрата олмайдиган бир оломонмиз. Қайтариб айтаман, оломонмиз. Чунки оломонда онг бўлмайди, фақат ҳиссиёт бўлади. Онг эса фақат миллат бўлиб шаклланган халқларда бўлади.
Яъни, ёнингдаги қаҳрамоннинг қаҳрамонлигини англаш учун ҳам мия керак. Ҳеч бўлмаса, чумчуқнинг миясидек мия керак. Одамда чумчуқнинг миясидек мия бўлмаганидан кейин, одам қўрқоқ билан қаҳрамонни фарқлай олмайди. Атрофда нима бўлаётганини англамайди. Миясиз амёбалар фақат қорнини тўйғазиш учун яшагани каби, миясиз одамлар ҳам фақат қорни оч бўлганини ва ҳожатга чиққиси келганини англашади холос.
Эркаклари қўрқоқ бўлган халқнинг аёллари жасур бўлади. Тўғрироғи, жасур бўлишга мажбур бўлади. Чунки миллатнинг эркаклари тирик ўликлар мақомида бўлса, миллатнинг ҳамма юки аёлларнинг гарданига тушади.
Натижада бундай элнинг аёллари қаҳрамонлик кўрсатишдан бошқа чораси қолмайди. Бундай элларнинг тирик мурда мақомидаги эркаклари хотинларининг ортига беркиниб олишади.
Бу мақомда яшагандан кўра, бир қарич арқон олиб, ўзини ўлдириш ўрнига, бундай эркаклар қўй ё ҳўкиз ўлдириб, ундан ош пишириб, ейишни яхши кўришади.
Миллат нимани севса шунинг атрофида бирлашади. Биз ошни севамиз ва шунинг учун ҳам фақат ош атрофида бирлашамиз. Биз озодликни севмаймиз. Шунинг учун ҳам биз зодлик, ҳурлик ва эркинлик ғоялари атрофида бирлаша олмаймиз.
Шунинг учун ҳам бизга демократия эмас, ойекратия керак. Ошйекратия орзусида яшаётган ошхўрларга қўйиб берсанг, “Ўзбекистон” номини “Ошхўристон”, деб ўзгартиришади.
Ҳар қандай ошхўр миллат алалоқибат босқинчиларга ош бўлади.
Фактларни ўрганинг ва фикр қилинг!
Бобомурод Абдулла
2021 йил 31 май
2 окт 2024
