日本耳機品牌final近年都有唔少支持者，近日正式推出新旗艦級真無線耳機ZE8000，新功能相當之多，比起之前的ZE3000可謂全面升級。
首先用咗全新設計單元，震膜冇用粘合劑，官方用8K音效去形容。機身設計好特別，耳膠亦都係特製。初初睇都驚會戴得唔穩陣，但實際試過發覺佩戴感出奇舒適。
聽感方面，ANC降噪效果算係相當自然，耳壓感唔大兼有出色隔音效果。不過最突出都係聽歌表現，用動圈單元嘅真無線耳機通常分析力都係差啲。ZE8000畀到乾淨細節嘅聲音之外，三頻都唔會太過分離，過渡自然。
之前用真無線耳機都總係覺得比較難處理一啲編曲複雜嘅band sound，今次ZE8000算係處理得相當出色，樂器定位分明之餘，成個音場都係開闊自然。
聲音表現好正，仲要有埋IPX4防濺水，加埋穩陣嘅佩戴感，個人覺得用嚟做運動都OK。不過都唔係一味讚嘅，缺點方面就係通話表現一般，同埋實試過目前好似只可以連一款裝置。
ZE8000 2月3日正式發售，售價係$2,380。雖然真無線耳機越出越好，都有好多唔錯嘅產品出現過，但ZE8000嘅表現都仲係相當亮眼，絕對值得大家落舖試一試。
#ze8000 #final #earphone #tws #anc #開箱 #評測 #gadgetgang
25 авг 2024
