Leon van Nierop het op Saterdag 8 Junie gesels oor EZRA, wat gaan oor 'n outistiese seun. Ezra is ‘n bedeesde, teruggetrokke rolprent wat outisme simpatiek behandel. Maar dit is eintlik die pa, energiek gespeel deur Bobby Canavale, wat hulp nodig het. Ezra is ‘n kunsrolprent waarin veral Robert de Niro kans kry om weer sy slag te wys. Slegs in teaters.
Hy het ook gesels oor die TV-reeks, Fellow Travellers, wat die horlosie terug draai na ‘n donker tyd in die Amerikaanse politiek in 1957, toe senator McCarthy, wat self ‘n paar geraamtes in die kas gehad het, politiek gedomineer het. Midde-in die politieke magspel ontmoet twee wyd-uiteenlopende mans mekaar. Matt Bomer is charismaties as ‘n politikus tot hy die skaam Jonathan Bailey in sy werkspasie ontmoet. Die onderstrominge en rugstekery in die Amerikaanse politiek word raak uitgebeeld in hierdie donker, spanningsdrama waar menslike emosies breekpunt bereik. Aanbeveel op Showmax.
17 июн 2024
