Fresh insider៖ ដើមកំណើតដំបូងរបស់សត្វអូដ្ឋ មិនមែននៅតំបន់មជ្ឈិមបូព៌ា 

Fresh insider៖ ដើមកំណើតដំបូងរបស់សត្វអូដ្ឋ មិនមែននៅតំបន់មជ្ឈិមបូព៌ា
(ភ្នំពេញ)៖ សត្វអូដ្ឋ (Camel) ជាសត្វពាហនៈមួយប្រភេទដែលមនុស្សប្រើប្រាស់ជាកម្លាំងដឹកជញ្ជូនអស់កាលរាប់ពាន់ឆ្នាំមកហើយ ដោយវាអាចឆ្លងកាត់វាលខ្សាច់រាប់ម៉ឺនគីឡូម៉ែត្រ និងអាចធ្វើដំណើរឆ្លងពីទ្វីបមួយទៅទ្វីបមួយបានទៀតផង។ ថ្វីដ្បិតអូដ្ឋមានវត្តមានច្រើននៅតំបន់មជ្ឈិមបូព៌ាក៏ពិតមែន ប៉ុន្តែដើមកំណើតដំបូងរបស់វាមិនមែននៅតំបន់វាលខ្សាច់នេះឡើយ។
តាមការសិក្សាស្រាវជ្រាវ សត្វដែលលក្ខណៈប្លែកពីសត្វប្រភេទនេះ ការពិតមានដើមកំណើតដំបូងនៅទ្វីបអាមេរិកខាងជើងឯណោះទេ។ វាបានចាប់កំណើតក្នុងតំបន់វាលស្មៅបៃតងខ្ចីនៅលើទ្វីបនេះកាលពីប្រមាណ២០លានឆ្នាំមុនមកម្ល៉េះ គឺដំណាលគ្នាជាមួយសត្វសេះ សត្វឆ្កែ និងសត្វឆ្មាដែរ។ ក្នុងពេលកកើតមានដំបូង សត្វអូដ្ឋមានរូបរាងដូចទៅនឹងសត្វហ្ស៊ីរ៉ាហ្វ (Giraffe) ហើយក៏ពុំទាន់មានមនុស្សណាយកវាមកធ្វើជាសត្វពាហនៈនៅឡើយដែរ។ រហូតដល់រយៈពេលប្រមាណ៤លានឆ្នាំក្រោយមក ទើបពពួកសត្វអូដ្ឋទាំងនោះចាប់ផ្ដើមបម្លាស់ទីចេញពីទ្វីបអាមេរិកខាងជើងឆ្លងពីអាឡាស្កាមកស៉ីបេរី និងបន្តមកដល់ទ្វីបអាស៉ី ដែលកាលណោះនៅមានដីទ្វីបអាចឆ្លងកាត់ទៅមកបាន។
រហូតមកដល់ចុងយុគទឹកកក (ប្រហែល១០,០០០ឆ្នាំមុន) សត្វអូដ្ឋអម្បូរដំបូងខាងលើនោះក៏បានដាច់ពូជពីទ្វីបអាមេរិកខាងជើង។ គ្មានទិន្នន័យច្បាស់លាស់ដែលអាចបញ្ជាក់បានថា ហេតុអ្វីទើបសត្វអូដ្ឋអម្បូរអាមេរិកខាងជើងនោះត្រូវដាច់ពូជនោះទេ មូលហេតុដ៏ច្បាស់លាស់បំផុត គឺបណ្តាលមកពីការផ្លាស់ប្តូរអាកាសធាតុ ប៉ុន្តែប្រសិននិយាយឱ្យកាន់តែជាក់លាក់ជាងនេះទៀត គឺបណ្តាលមកពីការផ្លាស់ប្តូរបរិមាណសារធាតុស៊ីលិកា (ជាតិស្វិត) ដែលមាននៅក្នុងស្មៅដែលជាចំណីរបស់ពួកវា។ អាកាសធាតុក្នុងទ្វីបអាមេរិកខាងជើងកាន់តែត្រជាក់ និងកាន់តែស្ងួត រហូតធ្វើឱ្យកម្រិតស៊ីលិកាក្នុងស្មៅកើនឡើងដល់ទៅ៣ដងឯណោះ។ អូដ្ឋ និងសេះអម្បូរដំបូងនៅអាមេរិកខាងជើងនោះ គឺមានធ្មេញវែងៗ ខណៈពួកវាមិនអាចទំពាស្មៅដ៏សែនស្វិតទាំងនោះបានឡើយ។
មានភស្តុតាងបន្ថែមទៀតថា ដោយសារផ្លូវភៀសខ្លួនពីទ្វីបអាមេរិកខាងជើងមកកាន់ទ្វីបអាស៊ីត្រូវបានកាត់ផ្ដាច់ដោយសារការកើនឡើងនៃកម្ពស់ទឹកសមុទ្រ និងការរសាត់ដាច់ចេញពីគ្នារវាងទ្វីបអាមេរិកខាងជើង និងទ្វីបអាស៉ីកាលពីប្រមាណ១០,០០០ឆ្នាំមុនផងនោះ ទើបធ្វើឱ្យសត្វដ៏ទន់ជ្រាយទាំងនេះត្រូវមនុស្សតាមប្រមាញ់រហូតទាល់តែដាច់ពូជអស់។ ចំពោះក្រុមសត្វអូដ្ឋដែលបានឆ្លងមកដល់ទ្វីបអាស៉ីផុតហើយនោះ ក៏បានបន្តរស់នៅនិងវិវត្តរាងកាយបន្តិចម្ដងៗក្លាយជាសត្វអូដ្ឋដូចសព្វថ្ងៃ ហើយក៏ត្រូវបានមនុស្សចាប់យកមកចិញ្ចឹម និងធ្វើជាសត្វពាហនៈរហូតដល់ពេលបច្ចុប្បន្ន៕