QARIŞQA ÖMRÜ / Ramiz Rövşən 🐜 Yaşamaq, doğrudan, çox gözəl işdi, Bir az pulun olsun, bir az imkanın. Dörd yanın şıdırğı alış-verişdi; Arzu bazarıdı, ümid dükanı. Dolan bu bazarı, atam balası, Simiclik eləmə qəpik-quruşa. Lənkəran limonu, Şəki halvası… Turşu şirinə qat, şirini turşa. Hələ o şütüyən maşınlara bax, Baxıb için-için bir az yan hələ. Sənə də bir maşın yetirər Allah, Bir az səbrini bas, cavansan hələ. Hələ ki bu metro düşüb baxtına, Axına qarışıb sən də axarsan. Girib “Baksovet”də yerin altına, Montində xortdayıb yerdən çıxarsan. Belə yaşayarsan ömrünü hər gün, Axı kim deyir ki, sən pis gündəsən?.. Qarışqa ömrüdü hələ ki ömrün, Yerin gah altında, gah üstündəsən. Darıxma, qarışqam, az qalıb yaza, səni sevindirər bu gələn bahar. Atlı qarışqasan, bəlkə… haçansa hələ qanadlanıb uçmağın da var. Mən də qarışqayam, qadası, mən də, Bunu yazdım sənə mən öz adımdan. Yəqin bu yerlərdən uçub gedəndə Mənə əl eləmək çıxmaz yadından…
Çox gözəl veriliş alınıb,bütün verilişlərə belə gözəl,maraqlı,maarifləndirici olmağı arzu edirəm.Kamal bəyin səsini dinləmək o qədər xoşdur,doğmadır ki, ifa etdiyi şeirlərə yeni nəfəs verir."Qar adamı"şeiri də onlardan biridir.Hər dəfə bu şeiri sizin ifanızda dinlədikdə insan kövrəlir,amma bu kövrəlmə insana pis hislər yaşatmır,əksinə həyatı daha dərindən dərk etməsinə səbəb olur.Çox sağ olun,var olun,gözəl insan❤️💫🍀
