Husaynxon Yahyo Abdulmajid qori tomonlaridan bitilgan va ijro qilingan tafakkurga undovchi sh'er.
Video so'ngida Hazrat ushbu she'r haqidagi fikrlarini, yaxshi ko'rib o'qishlarini aytganlar 😊
islom.uz portalidagi ilmiy-amaliy anjuman.
09.12.2012
👉 Manba: muslimaat.uz
Gul bilan suhbat
Koʻrindi bu kecha gulda munojot,
Zaboni hol bilan kechdi muloqot.
Dedim: «Ey gul, nechun chehrang qizildir?»
Dedi: «Ey qul, yuz izhori koʻngildir».
Dedim: «Nedan ajab nozikbadansan?»
Dedi: «Dil nozik ersa, naylasin tan?!».
Dedim: «Jismingda yoʻq gʻunchangdagi boʻy?»
Dedi: «Xulqing ogʻizdan koʻrsatar boʻy».
Dedim: «Barging yashil erkan, goʻzaldir»,
Dedi: «Orzu-umidlardan masaldir».
Dedim: «Soʻlgʻin koʻringaysan xazonda?»
Dedi: «Bu yerga yotmoqdan nishon-da».
Dedim: «Hosillaringni ne qilarsan?»
Dedi: «Suv ichgan oʻrnimga toʻkarman».
Dedim: «Uzmish gulingni bir necha yosh?»
Dedi: «To lab ochildi, ketdi bu bosh!»
Dedim: «Bormi sening bir bogʻboning?»
Dedi: «Jisming turarmi, yoʻqsa joning?»
Dedim: «Bulbul senga oshiq ekan koʻp?»
Dedi: «Bogʻbondir ishq ahliga mahbub».
Dedim: «Har yaprogʻing sanʼat nishoni»,
Dedi: «Har biri bogʻbon dostoni».
Dedim: « Nega boqarsan koʻkka doim?»
Dedi: “Dil talpinar, aytib «ilohim».
Dedim: «Qancha quyoshdan bahravar tan?»
Dedi: «Har qancha unga yuzlanarman».
Dedim: «Yoningda bu ajriqqa ne bor?»
Dedi: «Tushsa nazarlar, aylagay kor».
Dedim: «Nega goʻzallik ramzi sensan?»
Dedi: «Doim tabassum sunnat erkan».
Dedim: «Sen qoʻlma-qoʻl xalq ichra doim»,
Dedi: «Sen ham tikonsiz boʻl, muloyim».
Dedim: «El yuzingga maftun boʻlarlar?»
Dedi: «Badboʻy esam, tashlab ketarlar».
Dedim: «Essa shaboda tebranarsan?!»
Dedi: «Gar tebranolmassan, sinarsan!»
Dedim: «Ari asal olgay gulingdan».
Dedi: «Yaxshi, yomon bori tilingdan».
Dedim: «Husningga oshiqlar sanoqsiz»,
Dedi: «Oʻtkinchi husn ishq(q)a yaroqsiz».
Dedim: «Qumgʻoq nega gul-gʻuncha ochmas?»
Dedi: «Bebahra suv birlan koʻkarmas».
Dedim: «Mevang yoʻgʻ-u, sen serxaridor?»
Dedi: «Xushchehralikda yaxshilik bor».
Dedim: «Jismingni yulganni netarsan?»
Dedi: «Ilgin oʻpib, atrim separman».
Dedim: Nedir hayoting qildi barbod?”
Dedi: «Barvaqt ochilmoq boʻldi, hayhot!»
Dedim: «Qaydansan-u, soʻng qayga ketmoq?»
Dedi: «Tufrogʻdan-u, tufroqqa qaytmoq».
Dedim: «Bu oʻrtada shaʼningga ne bor?»
Dedi: «Gullik vazifam qilmoq izhor».
Dedim: «Umring, valekin, uncha ermas»,
Dedi: «Bir gul boʻlishga yetmogʻi bas».
Dedim: «Endi qachon sen-la koʻrishmoq?»
Dedi: «Sen-la koʻrishmoq oʻrni uchmoq».
Dedim: «Menga nasihat ayla bir dam»,
Dedi: «Tufrogʻni yod et, ojiz odam!»
Dedim: «Menga vasiyat qil, qadrdon»,
Dedi: «Qullik vazifang, hazrat inson!»
Ijtimoiy tarmoqdagi sahifalarimiz:👇
Telegram - t.me/HasanHusayn
Instagram - / hasanhusaynabdulmajid
Facebook - / hasanhusaynabdulmajid
15 окт 2024