Tónlistarmaðurinn Helgi Björnsson er í Sjónvarpi Símans á laugardögum en nú undir nýjum formerkjum og nafni, en þátturinn hefur fengið nafnið „Það er komin Helgi“. Helgi vann hug og hjarta landsmanna í þáttunum Heima með Helga í vetur en þar tók hann á móti gestum í kvöldvökustemningu í beinni útsendingu heim til landsmanna.
Nú verða þættirnir ekki „heima hjá Helga“ heldur sendir út frá Hlégarði í Mosfellsbæ. Helgi tekur sem fyrr á móti einvalaliði gesta, hvort sem þeir koma úr röðum tónlistarmanna eða leikara, en gestalisti Helga verður hulinn miklum leyndarhjúpi og kemur ekki í ljós fyrr en í útsendingunni hverjir eru gestir kvöldsins hverju sinni.
Í nýju seríunni verður gefið meira rými fyrir kerskni og gamanmál. „Okkur langaði aðeins að víkka rými samtalsins og gefa okkur færi á smá sprelli en auðvitað er tónlistin, sem fyrr, alltumlykjandi í þessu hjá okkur. Sú formúla fór vel í landsmenn og engin ástæða til að breyta því,“ segir Helgi, sem nú getur orðið bætt titlinum þáttarstjórnandi við röð titla á borð við söngvari, leikari og framleiðandi svo eitthvað sé upp talið.
21 окт 2024
