XOŞEWÎSTA SÎNGSEDEF
xoşewîsta sîngsedef
ez te ji wîzewîza pêlên bareşa felekê
dipirsim
tevna hezkirin û bêrîkirina te
bi pîzotên agirê dilê kewgirîn
dihûnim
ji keziyên porê te ya mircanî
bêhna qurnefîlan
difûre
bêyî te
ez bûm çûka hêlîn wêran bûyî
û şeveder mayî
bîranînên temenê zû kal bûyî
xwîn vedirişin
ma tu çi bûyî bûka bin perda
veşartî û fedîyok
wek Mecnûnê li Leylaya xwe digerî
ez jî
li nav toza çolistanên xewle
li şopa bêhna henasa te ya germ
digerim
her şev
meya sewdaseriya te
dinoşim
di mestbûna xwe de
wek perperikan li dor bejna te
ya fîdanî semaha ferişteyan
digerînim
were
bi ramûsanên xunava lêvên sor
birîna êşên bêderman
bikewîne
bi şewqa awirên efsûnî
şevistanên tenêtiya wêran
bibiriqîne
bi hîqehîqa kenê şîrîn û şad
qêrîna dergûşa nava min
aşt bike
li dûrî hesretkêşiya te
gewriya xeyalên bêdeng
di îskeîska kelegirînê de
fetisî
her roj li ber sîtavka neynikê
pore janêşên bêçare şê dikim
ez ê
bibim çarçoveya wêneya
şewq û şemala rûyê te ya nûranî
li nav rûpelên deftera tî û birçî
te bikim helbesteke qet ji bîr nebûyî
li ser têlên tembûra xeyîdî
te bikim awaza kilameke bi şan
û şuhret
tu
periya îlhama derûniya min î
horiya baxçeya bihuşta min î
xuşexuşa peşkên barana hewşa
koz û kulfeta min î
rengê keskesora asoya
xewnên min î
roniya heyva giyanê yekşevî yî
malxirabê êdî bese were
hiş û aqil di serê min de
gêj û sersem bûn
min hemû dergehên demsalan
ji hatina te re vekiriye
were xoşewîsta min
Xizan Şîlan
2024-03-13
Stockholm
@HunergehaWelat
@MemmusX
@hakkari_tv
26 авг 2024