Saatlı sakinləri etiraz aksiyası keçirib. Bir qrup sakin bu gün - aprelin 28-də Saatlı rayon İcra Hakimiyyətinin qarşısına toplaşıblar. Onlar rayonun icra başçısı ilə görüş tələb ediblər. Sakinlər əkin torpaqlarının zəbt olunmasından tutmuş isizliyə qədər saysız-hesabsız şikayətlərinin araşdırılmadığından, onlara olan biganə münasibətdən narazıdırlar.
Sakinlərdən bəziləri icra hakimiyyəti aparatının binasına keçməyə cəhd ediblər, polis onların qarşısını alıb. Daha sonra sakinlər binanın toplantı zalına dəvət olunub, onları icra başçısı Elmir Bağırovun qəbul edəcəyi bildirilib. Amma şikayətçilər jurnalistlərin zala buraxılmamasına etiraz olaraq qəbuldan imtina ediblər.
Saatlı Rayon İcra Hakimiyyəti başçısının köməkçisi Ruhid Əzizov isə Azadlıq Radiosuna açıqlamasında ünvanlarına səslənən ittihamlarla razılaşmayıb. Deyib ki, icra hakimiyyətində hər həftə qəbul keçirilir, vətəndaşları icra başçısı şəxsən özü qəbul edir, qurumun səlahiyyətində olan məsələlər həll olunur. O ki qaldı müharibə iştirakçılarının tələbinə, Ruhid Əzizov deyir ki, onların tələbləri - yerli bələdiyyələr tərəfindən torpaqla təmin olunmaları məsələsi operativ olaraq həll ediləcək.
41 yaşlı Elmir Bağırov ötən ilin avqustunda prezidentin sərəncamı ilə Saatlının icra başçısı təyin olunub.
13 сен 2024
