SAHARDA ISTIGʻFOR AYTISH XOSIYATI
Sahar chog‘ida, atrof sokin, havo musaffo bir vaqtda istig‘for aytishning o‘ziga xos gashti bor. Bu paytda bedor bo‘lish - tahajjud namozi o‘qish, Qur’on tilovat qilish, zikr-tasbeh, istig‘for aytish qalbga quvonch, tanaga tetiklik bag‘ishlaydi.
Qur’oni karimda taqvodorlar sifatlari shunday keltirilgan:
“Ular (dunyoda): “Parvardigoro, biz Senga imon keltirganmiz. Endi O‘zing gunohlarimizni kechir, bizni do‘zax azobidan asra”, deb (Allohga iltijo qilgan) edilar. Ular sabrli, sadoqatli, itoatli, saxovatli, saharlarda Allohga istig‘for aytadigan kishilar edi” (Oli Imron surasi, 17-18-oyatlar).
Odamlar ayni shirin uyqudaligida turib namoz o‘qish, istig‘for aytish har kimning ham qo‘lidan kelavermaydi. Buning uchun kuchli imon, ixlos, qunt, hafsala bo‘lishi kerak.
Sahobai kiromlar saharda istig‘for aytishni odat qilishgandi. Zero, Anas ibn Molik roziyallohu anhuga ko‘ra, Rasululloh sollallohu alayhi va sallam ularga saharda yetmish marta istig‘for aytishni buyurgandilar .
Rivoyat qilinishicha, ulug‘ sahoba Abdulloh ibn Umar roziyallohu anhu tungi namozni o‘qib bo‘lib, shogirdidan: “Ey Nofe’, sahar vaqti kirdimi?” deb so‘rardi. Agar Nofe’ “Ha”, desa, tong otguncha duo qilardi, istig‘for aytardi .
Ibrohim ibn Hotib otasidan rivoyat qiladi: “Men saharda masjid burchagida bir kishi: “Parvardigorim! Sen buyurding, men itoat etdim. Hozir sahar vaqti. Mening gunohlarimni kechir!” deb duo qilayotganini eshitdim. Qarasam, u Abdulloh ibn Mas’ud ekan ”.
"Istig‘forning 40 xosiyati" kitobidan.
--
UYQUDAN OLDIN O‘QILADIGAN SURALAR
Inson hayotida uyquning o‘rni beqiyos. Kun bo‘yi ishlab charchagan tana a’zolari dam olib kuch yig‘ishi, sog‘lom, tetik bo‘lishi uchun vaqtida uxlab hordiq chiqarish kerak. Lekin uyqu doim ham ko‘ngildagidek bo‘lavermaydi. Xalqimizda “Notinch ko‘ngilga uyqu kelmaydi” degan gap bor. Inson salbiy o‘y-xayollar ta’sirida yaxshi uxlay olmasligi mumkin.
Agar yotishdan oldin Qur’on o‘qilsa, mana shunday noxush holatlar oldi olinadi.
Anas roziyallohu anhudan rivoyat qilinishicha, Rasululloh sollallohu alayhi vasallam:
“Agar to‘shakka yotganingda, Fotiha bilan Ixlos surasini o‘qisang, o‘limdan boshqa har qanday narsadan salomat bo‘lasan”, deganlar .
Oisha roziyallohu anho onamizdan rivoyat qilinishicha, Nabiy sollallohu alayhi vasallam Zumar va Bani Isroil suralarini o‘qimasdan uyquga ketmasdilar.
Yana bir rivoyatda aytilishicha, Rasuli akram sollallohu alayhi vasallam uxlashdan oldin musabbihotni o‘qirdilar, “Unda ming oyatdan yaxshiroq oyat bor”, deb aytardilar .
Payg‘ambar alayhissalom “sabbaha”, “yusabbihu”, “subhana”, “sabbih” so‘zlari bilan boshlanadigan suralarni uyqudan oldin o‘qirdilar, mazkur suralarda ming oyatdan afzal oyat borligini aytardilar.
Jobir roziyallohu anhu rivoyat qiladi: “Nabiy sollallohu alayhi va sallam uyqudan oldin Sajda bilan Taborak surasini o‘qirdilar ”.
Yana bir hadisda shunday deyilgan: “Kim kechasi Duxon surasini o‘qisa, 70.000 farishta tonggacha uning haqiga istig‘for aytib chiqadi ”.
Rivoyat qilinishicha, Nabiy sollallohu alayhi va sallam Navfal ismli sahobaga: “Uxlashingdan oldin Kofirun surasini o‘qi. Zero, u shirkdan omonlikdir”, deganlar.
Oisha roziyallohu anhodan rivoyat qilinishicha, Nabiy sollallohu alayhi va sallam kechasi uxlashdan oldin kaftlarini jamlab, avval unga puflar , keyin Ixlos, Falaq, Nos suralarini o‘qib qo‘llari yetgancha butun badanlariga surtardilar. Avval boshlariga, yuzlariga, keyin qolgan a’zolariga surkardilar. U zot buni uch marta takrorlardilar.
"Qur’on - qalblar shifosi"kitobidan.
----------
KO’PROQ VIDEOLAR UCHUN OBUNA BO’LING!
“IQRO TV" kanali sahifalari:
Telegram - t.me/joinchat/...
Instagram - / iqrotvuz
RU-vid - / @iqrotvuz
TikTok - / iqrotvuz
Iqro Media bilan Islom olamiga sayohat qiling! - t.me/iqromediabot
#istigfor #duo #alafasy
5 сен 2024