Hello, madlang people! Ano’ng hanap natin for today’s video? Kung good vibes ang gusto, don’t worry, marami n’yan dito! May bonus pang kantahan at konting sayawan, plus nag-uumapaw na tawanan. Para naman sa mga naghahanap ng ka-spark, ma-inspire sa mga bagong ‘campers’ ng reality queer dating show Sparks Camp Season 2.
Wednesday pa lang pero ang mga ganap sa “Showing Bulilit,” pang-grand finale na ng week dahil sa tindi ng labanan sa hulaan.
Si Lassy, hindi nagpadala sa awa kaya’t agad pumindot para hindi makapuntos sina Kim Chiu at Ion Perez. Nagulat lang si Kimmy na mali ang sagot n’ya sa title ng pelikula ng ‘bestie’ niyang si Bela Padilla. Dapat kasi ang sagot ay sakto, walang labis, walang kulang, para hindi na maka-steal ang kalaban. Sina Vhong Navarro at Jackie Gonzaga, sinubukang mangopya at sulutin ang sagot nina Lassy at Vice Ganda, pero nililito lang pala sila ng kabila. Parang budol ang galawan!
Speaking of galawan, aliw ang grupo sa pa-sample ni Jackie ng “Water.” Pero si ‘Kuys’ Vhong, iba ang napansin sa pagsayaw ni Meme! Ah, basta, agaw-pansin din ang kagwapuhan ni Ion, kaya si Meme, hindi maiwasang mapalingon! Samantala, ang aktingan ng mga cutie ‘bulilits’ na sina Argus, Kulot, Kelsey, at Jaze, worthy of a standing ovation.
You miss the moments but not the person, ‘ika nga. ‘Yan ang inamin ng mag-ex na sina Caryl at Melgar nang muli silang magharap sa “EXpecially For You.”
Relasyon nila’y inilihim sa workplace dahil ligawan ay ipinagbabawal sa mga empleyado. At dahil pag-ibig nila’y sikreto, si Melgar, madalas magselos sa pakiki-bonding ni Caryl sa iba nilang katrabaho.
‘Pag selos ang pumasok sa puso ninuman, at hindi naplantsa sa maayos na usapan, malamang ang relasyon ay mauwi sa hiwalayan.
Sa panlabas, sila’y mukhang sweet at mahinhin. Pero pagdating sa singing, palaban ang dalawang estudyante na kumasa sa hamon ng “Tawag Ng Tanghalan The School Showdown.”
Matamis ang performance ni Andrea Julian, ang pambato ng Nuestra Senora De Aranzazu Parochial School, na kumanta ng “Your Song.” Napansin nga nina Vice at Jackie ang pagiging pleasant and pretty ng young binibini.
Hindi rin nagpatalo ang pambato ng King Thomas Learning Academy Inc. na si Carmelle Collado. Pag-awit n’ya ng “I Am Changing,” nagpabilib sa mga hurado. Siya ang nakakuha ng mas mataas na grado mula kina Ogie Alcasid, Zsa Zsa Padilla, at Darren Espanto.
25 июн 2024
