Jamita Epistel Minggu XX Trinitas
13 Oktober 2024
Rom 1:16-17
“Halak partigor i mangolu do binahen haporseaonna”
Huria ni Tuhanta….
Ilustrasi: Pajumpang ma di na sahali sahalak Pandita dohot Tokke Sabun, mardalan ma nasida di pinggir ni sunge jala dibukka ma panghataion songon on:
Tokke sabun : Toho do ditangihon jolma jamitam? Hira so marlapatan do
huida angka barita nauli na jinamitam.
Pandita : Bah boasa didok ho songon i? Molo marjamita au torop do
manangihon.
Tokke sabun : Godang dope parjahat di tano on, panangko, pargabus, dohot
koruptor.
(Tarsonggot do Pandita i umbege hata ni tokke sabun i; alai tompu ma diida ibana angka dakdanak marmeami gambo di pinggir sunge i, gabe dialusi pandita i ma, songon on)
Pandita : Ai sabunmi pe so marlapatan huida, hape iklanna luar biasa
idaon. Ndang sesuai iklan tu kenyataanna.
Tokke Sabun : Boasa didok ho songon i?
Pandita : Bereng ma ndi an, ai godang dope angka na kotor
margambogambo pamatang ni jolma, (laos ditudu ibana
angka dakdanak na marmeami gambo i)
Tokke Sabun : Asa botoonmu, sabun i marguna molo dipangke! Kan na so
dipangke ibana do, tong ma ibana kotor. Suba jo dipangke
ibana sabun i laos maridi, pasti ias pamatangna i.
Pandita : Toho do nanidokmi, jamita i pe songon i do, marguna do i
molo dipangke jolma i di ngoluna (sai na dibahen do, ninna
pandita i)
Tokke Sabun : Oh ido ate. Ok lah. Marguna molo dipangke.
Ilustrasi on mangajarhon tu hita: MARGUNA MOLO DIHANGOLUHON.
Huria ni Tuhanta….
Di turpuk jamita on, tung tangkas do dihajongjonghon apostel Paulus hagogoon ni Barita na Uli: “Ai ndang na huhailahon Barita na Uli i, ai hagogoon ni Debata do i paluahon nasa na porsea (Rom 1:16). Ndang holan pernyataan sambing umbahen na didok apostel Paulus songon i, alai borhat sian pengalamanna sandiri na manghilala hagogoon ni Barita na Uli i na paimbaruhon ngoluna.
Silele Kristen hian do ibana gabe sahalak Kristen sejati; naso mananda Jesus Sipalua i, gabe naposo haposan ni Kristus i; na manghasogohon angka parbarita na uli hian ibana, gabe parbarita na uli na super semangat.
Marlojong ibana sian huta tu huta, sian luat na sada tu luat na asing. Ndang marnaloja jala ndang mabiar di sude mara na niadopanna. Na ringkot di ibana ima: PARARATHON BARITA NA ULI ASA TOROP JOLMA MARHAPORSEAON.
Didok ibana: halak Jahudi jumolo, dung i dohot do halak Gorik. Lapatanna: Barita na Uli i ingkon sahat tu saluhut jolma, universal, ndada holan tu sada houm, marga, manang sada bangso. Alai manang ise na manjanghon jala porsea di Barita na Uli i gabe taruli do nasida di hagogoon ni Debata jala dapotan hangoluan dohot haluaon na manongtong.
Manang ise na tumangihon Hata ni Debata gabe tubu haporseaonna: “Asa sian na tumangihon do ro haporseaon; ia panangihon i, sian hata ni Kristus do” (Rom 10:17). Mangolu ma ibana binahen ni haporseaonna i. Boha parjadina? Hata ni Debata patubu haporseaon, binahen ni haporseaonna i tubu ma panghirimon dohot pos ni roha mandalani ngolu on, gabe semangat, hehe, hinsa, jala margogoon patupahonsa.
Angkup nii, dipajojor Paulus do hagogoon ni Barita na Uli i ima: Gabe patar do disi hatigoran ni Debata. Hatigoran ni Debata ndada holan taringot tu angka na mangulahon patik; ai ndang patik i be na manontuhon haluaon ni sasahalak, alai marhite asi ni roha ni Kristus i manghophop jolma pardosa i, asa gabe porsea jala dapotan hangoluan dohot haluaon. Ido na dipapatar Barita na Uli i jala halak na mangjanghon Ibana gabe dipintori Debata. Ido umbahen niajarhon Paulus pandohan “Sola Gratia, Sola Fide, dohot Sola Scriptura”. Dapotan haluaon do jolma pardosa i holan ala asi ni roha ni Debata di bagasan Kristus Jesus. Laos disi do patar hatigoran ni Debata na sian haporseaon tu haporseaon. Na mangolu do partigor i hinorhon ni haporseaonna (Rom 1:17).
Huria ni Tuhanta…….
On do sipahusorhusoron di bagasan rohanta: Na mangolu do partigor i hinorhon ni haporseaonna.
Antong taparinggas ma manjaha dohot manangihon Hata ni Debata, asa tongtong hita dipaingot jala ditogu tu harajaonNa i. Unang hailahon Barita na Uli i, ai ido hagogoon ni Debata paluahon nasa na porsea, papatarhon hatigoran, dohot mangalehon hangoluan.
Taulahon ma ulaonta hombar tu Hata ni Debata. Ai dipauba Hata ni Debata do hita asa lam dumenggan parngoluonta. Ala na manangihon Hata ni Debata do hita umbahen tarbahen hita mangulahon na denggan; ala na tatangihon do Hata i umbahen marhaporseaon; ala na marhaporseaon do umbahen marhatigoran, jala ala marhatigoran do umbahen dapotan hangoluan dohot haluaon.
Antong TAULAHON ma asa marguna. Songon ilustrasi nangkin, Ndang marguna sabun i molo so dipangke; ndang marguna Hata ni Debata molo so dihaporseai; jala ndang marguna haporseaon i molo so diulahon; molo diulahon gabe mangolu ma hita binahen nii. AMEN
Salam Sejahtera, Salam Sahabat, Salam Sehat.
#jamitapartangiangan
#rom1
#roberthendrasimanjuntak
#robertsimanjuntak
10 окт 2024
