實力好重要,堅持好重要,努力好重要,但要食呢行飯,有時伯樂更重要。柳應廷應該係唯一單憑唱歌歌聲,而被花姐認可嘅Mirror 成員,堅持救佢入返造星,50強夾硬變55強,再三顧茅蘆咁勸佢入團。身為柳炒真係好多謝花姐(眼濕濕ing) 柳兒喺造星1同第一年出道嘅 Mirror 之中,仲係原石階段,未經打磨。柳兒同大表哥Stanley 係12個當中,最遲有Fans Club…(講起都眼濕濕)直到造星2,柳兒多咗機會企喺Spotlight下唱歌,令到多咗好多人發現佢嘅魅力。好記得其中有一段,Mirror 成員要面對被40強挑選分組,柳兒表演完但冇人揀入組⋯⋯彩排時花姐話:「就算佢哋40個(參賽者)唔揀你唔鍾意你,你要記住,有我鍾意你!」(Edan亦都喺隔離大嗌:我都鍾意)(眼濕濕ing again) Solo又係另一回事,真係慶幸柳兒對音樂好有想法,小克同王雙駿真係好錫柳兒,或者應該話,好感受到呢個鐵三角班底有幾享受同投入呢兩步曲系列嘅創作,柳兒搵到好適合佢行嘅歌路,真係唔多流行曲係咁玩法。大家真係要去睇兩位大師為〈砂之器〉寫嘅making of 千字文,係另一種震撼。 By the way 就算攞咗叱吒新力軍金奬,都唔少人話柳應廷「乜水」,年頭首〈樂壇已死〉唔多唔少就係 inspired by 呢件事。