ABŞ Dövlət Departamenti beynəlxalq korrupsiya ilə mübarizə və insan haqları günləri ərəfəsində sanksiyaya məruz qalan fərdlərin siyahısını dərc edib.
Siyahıya Azərbaycandan ilk dəfə olaraq “Bandotdel” kimi tanınan Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin şöbə rəisi, polis polkovniki Kərim Heydər oğlu Əlimərdanov da daxil edilib.
Sanksiya siyahısına onun 2015 və 2016-cı illərdə insan hüquqlarını pozması və məhbuslara işgəncə verilməsində iştirakına görə daxil edildiyi bildirilir.
Kərim Əlimərdanovun adı Nardaran işində və gənc fəal Elgiz Qəhrəmanın məhkəmə prosesində hallanıb.
"Eşitmə qabiliyyətimi itirdim. Görmə qabiliyyətimə də təsirləri var. Sonra, əsəbilik artıb" ,- Nardaran hadisələri zamanı saxlanıldıqdan sonra yolda işgəncə gördüyünü deyən İbrahim Xudaverdiyev deyir.
2015-ci ildə Nardaran əməliyyatı zamanı saxlanılaraq "Bandotdel"ə aparılan, həm yolda, həm də idarədə ağır işgəncələrə məruz qalanlar arasında İbrahim Xudaverdiyev və Etibar İsmayılov da var. Onlar şəxsən Kərim Əlimərdanov tərəfindən qeyri-insanı rəftara məruz qaldıqlarını və bunun onların həyatında dərin izlər qoyduğunu deyir.
"Yolda gedəndə mən işgəncə almışam. Rafaellə ikimizin arasında dayanmışdı. Rafael oturduğu yerdə, mən arxası üstə idim maşının içində. Məni zərbələr tam tutmurdu. Silahın qundağı ilə vururdu. Deməli, mən 5 il sifətimin yarısını - sağ tərəfi hiss etməmişəm. 5 il hiss eləmədim. Sonra "Bandotdel”də də işgəncə olub. Amma o yolda olan işgəncənin yanında o işgəncə deyil. Belə də, hərdən 3-4 dəfə "dubinka" ilə vurublar. Bax bu cür olub".
Hüquqşünas Ruslan Əliyev deyir ki, 2015-ci ildə etdiyi qanunsuzluqlara görə ABŞ tərəfindən Kərim Əlimərdanov və ailəsinə viza, gediş-gəliş məhdudiyyəti qoyulub. Bu onun öz ölkəsində cəzasız qalmağına görədir.
"Adətən çox ciddi reportlara və çox ciddi sənədlərə və iddialara əsaslanmış olur. Məqsəd cəzasız saxlamamaq, cəzasız qalmamaq. Əsasən siyasi iradəyə bu cür hüquqi sanksiyalarla təsir etmək imkanı yaratmağı hədəfləyir",- hüquqşünas deyir.
2016-cı ilin avqustunda həbs olunan ictimai-siyasi fəal Elgiz Qəhrəman da şəxsən Kərim Əlimərdanov tərəfindən qeyri-insani rəftara məruz qalanlardandır. O, sanksiya haqqında qərarı eşitdikdən sonra unutduğu günlərə geri qayıdıb. Elgiz işgəncələrin onun səhhətində iz qoyduğunu və azadlığa çıxdıqdan sonra psixoloji yardım aldığını bildirir.
"Kərim Əlimərdanov əlində "dubinkayla" başımın eyni nöqtəsinə dəfələrlə zərbə endirirdi. Və ancaq eyni nöqtəyə vururdu. Hətta mən bu zərbələri saydım, 49-a kimi saya bildim, 49-dan sonra özümdən getmişdim" ,- Elgiz Qəhrəman deyir.
Həm Nardaran əməliyyatı zamanı həbs olunan zərərçəkmişlər, həm də Elgiz Qəhrəman Kərim Əlimərdanov haqqında çıxan qərara sevinsə də, bunu yetərli hesab etmirlər.
30 сен 2024
