ලංකාවට දුරින් වැඩිම දූපත වන කච්චතිව් දූපත බලා කිලෝමීටර 90ක මුහුදු ගමනක්.
අප දූපත කෙලවරට වන්නට ඇති ස්ථානයක කදවුරු ලා ගත්තේ දින දෙකක කාලයක් ගත කිරීමටයි. කදවුරු බැද අවසාන වන විට හවස පහ හමාර පසු වී තිබූ අතර ඉන්දියාවට ආසන්න ලංකාවට දුරම,ලංකාවට අයත් දූපතට හිරුගේ නික්ම යාම කෙලෙස නම් පෙනෙනු ඇත් දැයි අප සියලු දෙනාගේම මනස තුල ඇති වූයේ කුතුහලයකි. එමෙන්ම නාවුක ගමන අවසානයට මත්තෙන් අප යාත්‍රාව දූපතට ආසන්නව ගමන් කිරීමේ දී දුටු අඩි දහයක් පහළොවක් උස කොරල් තට්ටුව ආසන්නයටම ගොස් එහි සුන්දරත්වය දැක බලා ගැනීමත්,සිත තුල තිබූ ආශාවකි.
හිරු බැස යන සැන්දෑවේ සුදු පෙන කැටි නංවමින් වෙරළ මත පතිත වන කුඩා දිය රළ කොරල් පර මත වැදී නතර වන්නේ සොදුරු සංගීතයක් මවමිනි. එකිනෙකට වෙනස් වූ කොරල් පර මත කාලයක සිට පැල වී ඇති කුඩා ශාක සහ පඳුරු බොන්සායි පැල මෙන් සුන්දරත්වයෙන් අනූනය. ඒ ශාක මගින් කොරල් තට්ටුවට සහ දූපතේ ආරක්ෂාවට ඉතා විශාල දායකත්වයක් සපයන්නේ සොබාදහම, සොබාදහම විසින්ම රැක ගන්නා වගට සාක්ෂි සාධක සපයමිනි.
හිරු බැස යන තෙක්ම දූපත වටා ඇවිද ගිය අප අවසන සීතල මුහුදු ජලයට බැස නා කියා ගත්තේ හිරු ඉන්දියන් සාගරයේ කිමිදී යන්නට සැරසෙන නිමේෂයක යි.
රාත්‍රි කළුවර "කච්චතිව් දූපත" වෙලා ගනිද්දී කිතුණුවන්ගේ ප්‍රාර්ථනා එළි මුලු දූපත පුරා පැතිර ගියේ දමිල සහ සිංහල බසින් හැඩ ගැන් වී තිබූ ගීතිකා හඩත් සමග යි. දේවස්ථානය වෙත ගමන් කල අප "ශාන්ත අන්තෝනි මුනිදුන්" වැද නමස්කාර කොට නෙත් අයාගෙන බලා සිටියේ ලාංකිකයන් සහ ඉන්දියානුවන් කෙතරම් නම් සහජීවනයකින් මෙම වතාවත් සිදු කරනවාද යන වගයි. දූපතටම ඇති එකම දේවස්ථානය විදුලි බුබුළු වලින් හැඩ ගන්වා තිබුනේ දිව්‍ය මන්දිරයක් පරිද්දෙනි. මා මාගේ හදවතටම කියා ගත්තේ " මෙය මා පමණක් නොව, ලොව පුරා සිටින සියල්ලන්ම දැකිය යුතු සහ විදිය යුතු චමත්කාර හැගීමක් " යන වගයි.
පූජාව අවසන් වූ පසු අප කංඩායම නැවතත් ඇවිද ගියේ අප පැමිණි සුදු වැලි මංපෙත වෙතයි. කුඩා කඩ සහ සල්පිල් වලින් පිරී ගිය මංපෙත ඉන්දියානු ජාතික වෙළෙන්දන් ගෙන් සහ ශ්‍රී ලාංකික වෙළෙන්දන්ගෙන් පිරී ගොසිනි. විවිධ සහ විචිත්‍ර වූ ඉන්දියානු ඇදුම් පැලදුම් සහ ආයිත්තම් සල්පිල් පුරා වෙළදාම් වන්නේ ඉතා අඩු මුදලකට යි. මේ අතර ඒ මේ අත ඇවිදිමින් සිටි තේ වෙළෙන්දකු හා දොඩමලු වීමට මට හැකි විය. තේ කේතල් දෙකකට අමතරව ඔහුගේ අතේ මුදල් මිටියකි. එය කොටස් දෙකකට බෙදාගෙන සිටින්නේ කච්චතිව් දූපතේ ගණු දෙනු සිදු වන්නේ දෙරටක මුදල් වලින් නිසාවෙනි. ඔහු කැඩුනු සිංහලෙන් ඔහු අත රැදි මුදල් නෝට්ටු පෙන්වූයේ " යේ ශ්‍රී ලංකාන් සල්ලි.. යේ ඉංඩීය.. රුපීස්.." යනුවෙනි. නැවතත් සිනාමුසු මුහුනින් අපට සමු දී නැවතත් ඔහු ගමන් ඇරඹුවේ ඈතට යන තුරුම " ටී.. ප්ලේන්ටී.." කියමිනි.
සල්පිලට සමු දී නැවතත් කූඩාරම වෙත පැමිණි අප නාවික හමුදාවෙන් ලබා දුන් රාත්‍රි කෑම වේලත් රැගෙන තරු පිරුණු අහස යට නින්දට වැටුනේ ශ්‍රී ලාංකාවට දුරම දූපතේ ගත කල පළමු දිනය අවසන් කරමිනි.
"කච්චතිව් දූපත " වටා ගෙතී ඇති කතාන්දර කිහිපයකි. කලෙකට ඉහත දී ධීවර රැකියාවේ පැමිණි ධීවරයන් පිරිසක් ඈත දියඹේ අතරමං වී පසුව මෙම දූපත දක්වා පා වී පැමිණ තිබේ. ධීවරයන් හට සරණ වූ මේ දූපතේ පසු කාලීනව ධීවරයන් විසින් දේවස්ථානයක් ඉදි කරන්නේ "දුකේදී පිහිට වන සහ ලෙඩ දුක් වල දී සරණ වන බවට විශ්වාස කෙරන" "ශාන්ත අන්තෝනි මුනිදුන්ට" කැප කොටයි. ඉන් වසර ගණනාවකට පසුව නාවුක හමුදාව මගින් පැරණි දේවස්ථානයට සමීපවම ප්‍රමාණයෙන් විශාල සහ දැනට පූජා පවත්වන දේවස්ථානය ඉදි කරණු ලබන්නේ මේ දූපත ඔවුනට ද පිහිට සහ ආරක්ෂාව සපයන බවට ඇති විශ්වාසය මත සහ ජාතීන් දෙකක් එක්ව සිදු කරණ මෙම වාර්ශික මංගල්‍යයට තම දායකත්වය උපරිමයෙන් සපයමිනි.
උදෑසන සුන්දරත්වය. හිමිදිරි උදයේම මුහුදු ජලයට බැස නා පිරිසිදු වි නැවතත් දේවස්ථානය වෙත අප කංඩායම ගමන් කලේ එහි පැවැත්වෙන අවසාන පූජා කටයුතු සදහා සහභාගී වීමටයි. ඉන් අනතුරුව උදෑසන එකොලහ පැමිණ වන විට නැවතත් "කච්චතිව් දූපතේ පා වෙන ජැටියට පැමිණි අප තවත් නාවික යාත්‍රාවකින් නැවතත් "කුරිකඩ්ඩුවාන් ජැටිය" වෙත පැමිණීමට ගමන් ඇරඹුවේ ලබන වසරේත් පැවැත්වෙන මංගල්‍යයට සහභාගී වීමට ලැබේවා යි යන පැතුම පෙරදැරිව යි. ලංකාවට ඈතම දූපත ඈතට යන තෙක්ම මා යාත්‍රාවේ සිට බලා සිටියේ හෙටින් පසු හුදකලා දූපත කෙතරම් සොදුරු ඇත්දැයි සිතමිනි.
"කච්චතිව් දූපත" ලංකාවට පවරා ගැනීම සදහා කටයුතු කල "සිරිමාවෝ බංඩාරනායක" මැතිනිය ඇතුලු සියලුම නායකයන් හටත්. ඒ වෙනුවෙන් ඇප කැප වූ සියලුම මිනිසුන් හටත්, වාර්ශිකව පැවැත්වෙන දේව මෙහෙය සදහාත් "කච්චතිව් දූපත" සහ ශ්‍රී ලංකාවට අයත් සාගරය රැක ගැනීමට උපරිමයෙන්ම දායකත්වය සළසන කතෝලික ආගමික නායක තුමන්ලා,නාවුක හමුදාපති තුමා ඇතුලු සියලුම නාවුක නිළධාරින්ට සහ සෙසු නිළයින් වෙතත් අපගේ උත්තම ආචාරය පුද කිරීමට කැමැත්තෙමු.
රූප රචනාව හෙට 23/03/23
දහවල් 12:30 ට
එතෙක් ,
ආයුබෝවන් මම දිනේෂ් !
Once in a lifetime opportunity. Where Sri Lankan and Indian pilgrims together celebrate the festival of St Anthony on Kachchatheevu Island. Located about 90 km from Kankesanthurai, Kachchatheevu Island is a natural wonder. It took us around 3 hours by the ship, arranged by the Sri Lankan Navy. After arriving on the island, it was such a wonderfully festive feeling together with its natural beauty. Special thanks must go to Sri Lankan Navy for arranging this special event with the two nations. I hope you will enjoy this video
Greetings
I am Dinesh
➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖
➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖
Instagram - / dinesh_a_pathum
Message or information - / dinesh_a_pathum
DAP production
"සොබාදහම රකින්නා සොබාදහම විසින් රකිනු ලබයි"
22 мар 2023
