UPA H. THAWNZAGIN TANCHIN:
Pa Thawngzathang Hangshing leh Nu Ngemkhodon Tonsing-te tapa Upa H.Thawnzagin Parvatawm khua ah April 15, 1946 in piang a, a naupanlai hunte NE Tangnuam leh Parvatawm khua a zang in, 1963 kum in Parvatawm akipan Hanship khua ah pem uhi.
December 11, 1969 in Hanship EBC Biakinn ah Pu Nokkhothawn Naulak leh Pi Chinzen te' tanu Nungak Zenkhodon toh Pastor T. Lamgin khut ah kiteng ua, Tapa thum leh Tanu nih nei uhi.
A naupanlai in Jesu Khrist a hondampa ding in sang a, NE Tangnuam, Mizoram ah Pastor Dawnkima khut apan Baptisna tang in, May 1970 kum in khalam kimuhchianna thak nei a halhthakna tang in kipak mahmah hi.
May 5, 1972 kum in Thanlon khua ah pem ua, khotang vai PNC (tua PTC), YPA leh Saptuam ah akizattheihna bangbang in kizang tou hi.
March 1980 kum in Electric/Power Department, Manipur Governmenti nuai ah Sweeper nna mu in, Thanlon khua ah sem a, a hihtheih khomkhom a gin-om leh chimtak tak a asep nung in 2015 kum in pension hi.
Damlouhna leh sepna ziak in 1999 kum in Thanlon apan Dorcas Veng, New Lamka ah pem ua, tulel in Chiimtung Area, Dorcas Veng, New Lamka ah azi leh tate toh khosa uhi.
December 13, 1998 in EBC Kumsim Khawmpi 50na, Ebenezer Academy Ground, New Lamka ah Rev. L. Khamkholun khut ah Upa Orden na tang a, Pathian leh A Saptuam ading a apan theih dandan a apan nung in, EBC Kumsim Khawmpi 67na, 2015 kum in Upa Pahtakna Lai sang hi.
A mizia ah mi pautamlou leh kamsiam lua hilou napi in lawmngai mahmah mi ahi hi. Mi taima, nnasep hat leh kuhkal ahi a, a gensate leh abul apat vanglakte guitun leh tangtun sak sawma chitaktak a pang teitei mi ahi hi. Mi kidekzou leh kingainiam mi ahi a, a tunna leh phakna chiang chiang a kipak tak a pomthei leh lungkim thei mi ahi. Saptuam leh khotang a akizat khakna te ah leng amah-leh-amah, "Sing omlouhna ah gua kizang" a ki chisek hi.Innkuan kikhop a ngaihpoimoh ban ah lasak leh lenkhop lunglut in nuamsa a, mi lungleng thei tak leng hi in khuang leh sialki te tum a amah kia nangawn a lengkhawm khawm thei mi ahi hi."Ken seengvang ka gattheih leh nou seengziing na gat theih ding uh ahi" chih tuh atu-le-tate a hasotna poimoh leh manpha mahmah khat ahi hi.
A leitung khualzinna lampi ah damlouhna chituamtuam tuak sek in- gultuk, mom leh gulchi keih, ban ah sungna te na tuaktou a, kum 1998/99 in leng khuak lam ah buaina nasatak hon tuak mah leh Pathian hehpihna ziak a damna ngah in Pathian tung ah kipak mahmah hi.
Kum 2013 a kipan in Cardiac Obstructive Pulmonary Disease (COPD/Tuap natna) hon neipan a, kikem toutou a omlai, 2015 kum in agil ah Abdominal Aortic Aneurysm (AAA/sigui pipen bawklian) muhkhiak in om nawn hi. Tua a sigui a bawk ompen 2000 kum in GB Pant Hospital, Delhi ah operation neih in om a, a sigui sung ah Stent (sigui bawltawm) thuahsak in om hi. Kidawm siamtak leh pilvangtak a ki-enkol tou liailiai a omlai, June 2023 akipan in Thromboangitis Obliterans hon nei leuleu a, a khe apan a natna hong ki langkhia in kongpua kankhe zounawnlou in om hi. Etkol theih dandan a etkol himahleh awl awl a hong keniam hiai hiai in, hiai tan dinmun ahong tung hi.(#Asihni-27ᵗʰDecember,2023/2:09am)
Saptuam a kizatkhakna te:
ECC/EBCC Thanlon:
KTP(BYF) Founder Secretary: 1974
Naupang heutu (KNP): 1976-1978
Building Committee:
Local Committee:
School Committee:
EBCC Dorcas Veng:
Member TBSUC:
Chairman Tualsung Mission Committee: 2002-2005
Dorcas Committee Adviser: Kum khat
Membership:
GBC & BSI Patron Member
A Ta & tute:
1) H. Ginmuan h/o Ngaikhoching (Head Master Chingmun, EBC Vangai Division)
a. H. Ginthansang
b. H. Gouthianlal
c. Chiinnunmawi w/o N. Haukhup Bella Hoihthianbel
d. H. Siamthianmuang
2) Zamngaihchiin w/o Khamlunthang Suante
a. Chiinthianhoih
b. Thangminlun Suante
3) H. Thangkhansiam h/o Vungthianmuan (EBC Missionary Gangtok, Sikkim)
a. Mercy Manlawmkim
b. Priscilla Chingmalsawm
c. Samuel Muantanlian
4) H. Thangchinlam
5) Chiinbiakching
12 сен 2024
