L-OPPOŻIZZJONI TITGĦAJJAR, TIPPROVOKA, U TITLAQ ’IL BARRA 

ONE.COM.MT •
L-Oppożizzjoni telqet ‘il barra mill-Parlament wara seduta mimlija tgħajjir u provokazzjoni fejn ma ħallietx lill-Prim Ministru Robert Abela jagħmel id-diskors tiegħu, tant li d-diskors tal-Prim Ministru dam iktar minn siegħa b’riżultat tal-interuzzjonijiet.
L-Oppożizzjoni ma riditx tibqa’ tiddiskuti għax riedet tmur tagħmel id-diskorsi barra l-Parlament.
Id-deputat Karol Aquilina, il-Kap tal-Oppożizzjoni Bernard Grech, u l-eks Kap tal-Oppożizzjoni Adrian Delia kienu fost dawk li l-iktar li interrompew is-seduta u saħansitra mexxew attakk fuq l-ispeaker għax ma ridux lill-ispeaker iħalli n-naħa tal-Gvern tagħmel emenda għall-mozzjoni tal-Oppożizzjoni.
Ħin minnhom, Karol Aquilina deher ċar li beda jiddetta lil Bernard Grech x’għandu jgħid.
Wara dawn l-attakki ħarġu l-barra quddiem folla Nazzjonalista msaħħna minnhom u, hemm Bernard Grech għamel diskors mimli attakki fuq l-ispeaker.
Fil-Parlament, l-Oppożizzjoni ppruvat ma ħallietx lill-Gvern iressaq l-emendi tiegħu għal-mozzjoni li ressqet biex tiġi diskussa l-konċessjoni tat-tliet sptarijiet.
Din l-emenda fil-mozzjoni tagħti mandat sħiħ u fiduċja sħiħa lill-Gvern immexxi mill-Prim Ministru Robert Abela biex jieħu l-azzjonijiet kollha meħtiega u l-passi li jidhirlu xierqa fiċ-ċirkostanzi u fil-fora adatti, hekk kif dejjem għamel, fl-interess tal-poplu kollu, fil-mument opportun u meta jkun għaqli li jsir dan fl-interess nazzjonali.
Dan l-aġir mill-Oppożizzjoni kien konsistenti wkoll hekk kif mal-mument li fis-seduta parlamentari tal-lejla l-Prim Ministru Robert Abela beda jesponi l-qerq tal-eks Kap tal-Oppożizzjoni, Adrian Delia, fil-Kamra qamet komozzjoni sħiħa hekk kif Adrian Delia beda jgħajjat li l-Prim Ministru għandu jirtira dak li qal meta akkużah li gideb.
Il-Prim Ministru beda jikkwota fejn gideb Delia fl-argumentazzjoni tiegħu, u kull darba Delia beda jgħajjat u b’mod mill-iktar furjuż ma riedx iħalli lill-Prim Ministru jitkellem.
L-attitudni ta’ Delia kienet dik li kien ikollu fil-kampanja għall-Kap tal-Partit Nazzjonalista, meta ta’ kuljum kien jattakka lil Daphne Caruana Galizia.