Tapu kihe ‘Otua ‘oku ne ‘afio ‘I hotau lotolotonga
Pea kuou kole keu hūfanga he talamalu kakato ‘o e Fonuá, mo e Lotú.
Kae ‘atā ke halatu’u atú ‘a e fakahoha’a ni.
Kuo ‘ai tauanga’a ‘a e ‘api ko Lisiume, ‘esi ‘o Salote, mo e ‘esi ko Longolongo Folau. Pea tu’utu’utaufa ‘a e Hala Manga-Ono, mo lokatau e ‘otu peau ‘o e liku ngaoha’a ‘o Vava’u. Ī ‘o Mata’ahó, ‘esi ‘o Lepuhā kuo fa’ahikehea ‘a e fakalavetala, he kuo sīlongo ‘a e ‘Utula’aina. Hāngai Tokelau, talia mai ‘eku fakahoha’a ni, he ko ‘ene ‘alu ē ‘o ‘ikai ha toe foki mai.
Ko e tā ‘oku ongó, pea o’o, he tā ko e fakapō, kuo hake ‘a e peaú tupukosó, ‘o tafia ai ‘a e tokotaha na’e fai ki ai ‘emau na’una’ú he folau e ki’i famili ta’e’iloa ni. ‘Io, kuo tali he‘emau Tamaí ko SIAOSI ILOA I LANGIKAPO KUPU ‘a e ui mā’oni’oni mei he Ta’ehāmaí, ke hoko atu ‘ene fakafe’ao kihe ‘alofi ‘o e hau.
‘I he Efiafi Falaite hono 31 May koe pooni ia ‘e fai hono malanga’í mo hono ‘aofia e pekiá kihe falelotu Vaine Mo’onia (400 Richmond Road, Grey Lynn) ‘aia he’ikai toe fai ha failotu, ka ko e ouau malanga ‘o e pekia.
Pongipongi Tokonaki fakatava e famili pe 8am hono 1 ‘o Suné , ‘e fakahā’ele ‘a e pekiá hili pe lotu famili ki hono ‘api ma’ú kihe Mala’e Waikumete Cemetery ‘ihe 9.30am.
Ko e pōpoaki ia ‘oku ou ‘oatu ni mo e faka’apa’apa lahi atu mei he tu’unga fale ‘Eiki ‘o e pekia.
‘Ofa atu mo e Lotu.
ETONI TONGA KUPU
4 сен 2024
