பண் : புறநீர்மை. ராகம் : பூபாளம்
திருஞானசம்பந்தர் அருளிய மூன்றாம் திருமுறை.
குரல். : கேசவராஜ்.
பதிக வரலாறு :
பாண்டிய நாட்டில் சமணம் பெருகியது. பாண்டிய மன்னனும் சமண சமயத்தைச் சார்ந்தான். நாட்டு மக்களும் சமணர்கள் ஆயினர். பாண்டிய மன்னன் மனைவி மங்கையர்க்கரசியார், அமைச்சர் குலச்சிறையார் இவர்கள் இருவரும் மாறாமல் சைவத்தில் இருந்தனர்;
அவர்களது வேண்டுகோளுக்கு இணங்கித் திருஞான சம்பந்தர் வேதாரண்யத்திலிருந்து புறப்பட்டு மதுரை சென்றார். அகத்தியான்பள்ளி, கோடிக் குழகர் முதலிய தலங்களை வணங்கித் திருக்கொடுங்குன்றத்தைப் பணிந்து, மதுரையின் எல்லையை அடைந்தார்,
மங்கையர்க்கரசியார் ஞானசம்பந்தர் வருகையை அறிந்து ஊர் எல்லையில் வரவேற்குமாறு குலச்சிறையாரை அனுப்பியிருந்தார். மதுரை எல்லையை அடைந்த ஞானசம்பந்தரைக் குலச்சிறையார் வணங்கி வரவேற்றார். மதுரை மிக அண்மையிலுள்ளது என்றும் கூறினார். ஞானசம்பந்தர், "மதுரையில் உள்ள திருஆலவாய்க் கோயில் எப்பக்கம் உள்ளது`" எனக் கேட்கக், குலச்சிறையார் கோபுரத்துடன் திருக்கோயிலைச் சுட்டிக்காட்டி `அதுவே திருஆலவாய்` என்றார். அது கேட்டு, மங்கையர்க்கரசியார் குலச்சிறையார் இவர்களது பக்தி நலத்தைப் புகழ்ந்து திருப்பதிகம் பாடியபடி ஆலவாய்த் திருக்கோயிலைச் சம்பந்தர் சென்றடைந்தார்.
மங்கையர்க் கரசி வளவர்கோன் பாவை வரிவளைக் கைம்மட மானி
பங்கயச் செல்வி பாண்டிமா தேவி பணிசெய்து நாடொறும் பரவப்
பொங்கழ லுருவன் பூதநா யகன்நால் வேதமும் பொருள்களும் அருளி
அங்கயற் கண்ணி தன்னொடு மமர்ந்த ஆலவா யாவது மிதுவே.
24 окт 2024
