Mehnat kodeksining 119-moddasiga asosan, ishga qabul qilishni qonunga xilof ravishda rad etishga yo‘l qo‘yilmaydi. Ishga qabul qilish rad etilgan taqdirda, ish beruvchi ishga qabul qilish huquqiga ega bo‘lgan mansabdor shaxs tomonidan imzolangan ishga qabul qilishni rad etish sabablarining yozma asosini ishga qabul qilinishi rad etilgan shaxsning talabiga ko‘ra uch kunlik muddatda taqdim etishi shart. Yozma asosni berishni rad etish ishga qabul qilish qonunga xilof ravishda rad etilganligi ustidan shikoyat qilinishiga monelik qilmaydi. Mehnat kodeksining 560-moddasiga binoan, yakka tartibdagi mehnat nizosining ko‘rib chiqilishi uchun sudga murojaat qilishning aniq muddatlari belgilab qo’yilgan. Xususan, ishga tiklash to‘g‘risidagi nizolar bo‘yicha - xodimga u bilan mehnat shartnomasi bekor qilinganligi haqidagi ish beruvchi buyrug‘ining ko‘chirma nusxasi topshirilgan kundan e’tiboran uch oy ichida sudga da’vo kiritishi mumkin. Biroq sizning savolingizda shaxs (xodim emas) ishga qabul qilishni rad etilganligi ustida sudga qancha muddatda shikoyat qilishi mumkinligi so’ralmoqda. Mehnat kodeksining 560-moddasida ishga qabul qilishni qonunga xilof ravishda rad etilganda, buning ustidan qancha muddatda sudga shikoyat qilish mumkinligi haqida aniq javob ko’rsatilmagan. Qonun normalari mazmunini sharhlash orqali quyidagicha javob beramiz. Agar siz o’sha rad etilgan ishingizga ishga joylab qo’yishlarini so’rab sudga murojaat qilmoqchi bo’lsangiz, Mehnat kodeksi 119-moddasida nazarda tutilgan ishga qabul qilishni rad etish sabablarining yozma asosini olib, shu paytdan e'tiboran uch oylik muddatda sudga shikoyat qilishingiz mumkin. Bunda Mehnat kodeksi 32-moddasiga ko’ra, ish beruvchi tomonidan ishga qabul qilish qonunga xilof ravishda rad etilgan shaxslar bilan yakka tartibdagi mehnatga oid munosabatlar ish beruvchining zimmasiga mehnat shartnomasini tuzish majburiyatini yuklatish to‘g‘risidagi sud qarori qabul qilinishi natijasida tuzilgan mehnat shartnomasi asosida yuzaga keladi.