Саҳролардан келдим, чўллардан келдим,
Кўп узоқ, кўп қадим йўллардан келдим,
Ҳайдашди, дилингга диллардан келдим,
Менга меҳр кўргаз, меҳрибонлик қил.
Бунчалар бераҳм, золим одамлар,
Бунчалар залворли, оғир қадамлар,
Жудаям кераксан, жоним, шу дамлар,
Менга меҳр кўргаз, меҳрибонлик қил.
Бу иссиқ ёзларда совқотдим жуда,
Наҳотки ҳаммаси бекор, беҳуда,
Ўзингни уйғотгил ғафлат уйқудан,
Менга меҳр кўргаз, меҳрибонлик қил.
Ўттиз йилки, йўлим тугамади ҳеч,
Минг ўлдим, бу ўлим тугамади ҳеч,
Бугун ерта, ерта бўлмасидан кеч,
Менга меҳр кўргаз, меҳрибонлик қил.
Илоҳий суралар ўқиб келганман,
Тиллодан занжирлар тўқиб келганман,
Сени деб жаннатдан чиқиб келганман,
Менга меҳр кўргаз, меҳрибонлик қил.
@Yoshlartelekanali
13 июн 2023
