Qiroati: Muhammadloiq qori Aminov.
Tarjima: Shayx Muhammadsodiq Muhammad Yusuf.
JUMU’A SURASI
Madinada nozil bo‘lgan. 11 oyatdan iborat.
Bu sura Soff surasidan so‘ng nozil bo‘lgan. Mavzusi Soff surasida ko‘tarilgan masalalarga o‘xshash, lekin boshqacha, o‘ziga xos uslub bilan muolaja qilinadi. Suraning nomidan ham ma’lum bo‘lib turibdiki, unda juma namozi haqida so‘z ketadi. «Juma» - o‘zbek va boshqa turkiy tillarda arabcha «jumu’a» so‘zining bir oz buzib talaffuz etilishidir. «Jumu’a» so‘zi aslida «jam’» («jamlanish») so‘zidan olingan. Chunki juma kuni musulmonlar o‘zlarining ommaviy katta jamoatli namozlariga jamlanadilar. Alloh taolo musulmon bandalariga bu jamoat namozining aynan shu kunda o‘qilishini farz qilgan.
Surai karima Islom dini insoniyat uchun Allohning rahmati ekanini, ushbu din ila arablar shirk va zalolatdan xalos bo‘lganliklarini, bu din bashariyatning barcha dardlariga malham ekanini bayon qiladi.
So‘ngra yahudiylar haqida, Alloh taolo Tavrot hukmlariga amal qilishga buyurgan bo‘lishiga qaramay, ularning yo‘ldan ozganliklari, Allohning dinidan yuz o‘girib ketganliklari to‘g‘risida hikoya qilinadi.
Undan keyin juma namozi hukmlari haqida so‘z ketadi. U namozga azon aytilishi bilan mo‘minlar masjidlarga shoshilishlari zarurligi, bu vaqtda savdo-sotiq harom bo‘lishi bayon qilinadi. Namozga bormay, tijorat va o‘yin-kulgi bilan mashg‘ul bo‘lishning oqibati yomon bo‘lishi ta’kidlanadi.
23 апр 2021
