Nizami Rəmzinin ifa etdiyi siyasi-meyxananı video-rolik şəklində AzTV-nin əməkdaşı Hacı Asim Babayev təxminən 1992-ci ildə hazırlamışdır. Görüntülər "Səadət" sarayında (o illərdə bu saray ən dəbdəbəli şadlıq sarayı sayılırdı) keçirilən şair-qəzəlxan, meyxana ustası Tahir Rəvanın toy məclisindəndir. Allah Nizami Rəmziyə, balabançı Həsən (Qasan kimi tanınıb), Məhərrəm Nəcəfzadəyə (tar, saz, gitara ifaçısı) rəhmət eləsin, ruhları şad olsun. Məhərrəm 1980-ci ildən Bakı, Abşeron, Xızı toylarında sazı özünəməxsus ifası ilə təbliğ edirdi. Rolikin qəhrəmanları balabançı Qasanla müğənni Tahirə Məmmədli rəqs edirlər. Toydan əvvəl Meksikadan səfərdən qayıtmışdım, oradan xüsusi qablarda yerləşdirilən və qış rəmzi olan "qar yağması"nı gətirmişdim. Məhərrəm də həmin qarı Qasanla Tahirə xanımın başına səpələyir...