Hayaan ninyong ihatid ko sa inyong mga tahanan, opisina, paaralan o kung saan man kayong dako naroroon ang Larawan at Nobena ng Ating Ina ng Laging Saklolo tulad noong ginagawa ko noong isa pa akong laykong misyunero ng Kapatirang Redentorista sa Pilipinas. Noong panahong iyon, kasama ang mga pari, madre at mga layko, tinatawid namin ang ilog at dagat, inaakyat ang mga bundok, binabagtas ang mga kapatagan at nagpapasikotsikot sa mga eskinita upang ihatid at ipakilala ang Larawan ng Ina ng Laging Saklolo.
Hatid din namin ito sa panahon ng pagtugon sa mga kalamidad na dulot ng bagyo, pagputok ng bulkan, habagat, mga paglalaban tulad sa Marawi at iba pang sakuna. Kung saan saang dako na rin ng Pilipinas nakarating ang mga inipong tulong mula sa mga deboto ng Ina ng Laging Saklolo. Ito ang pagpapahayg nila na dahil nakakatanggap sila ng saklolo, ay isinasabuhay naman nila ang pagiging saklolo sa iba.
Nakakatuwa na hindi lamang sa loob ng ating bansa makakarating itong larawan at nobena sa Ating Ina ng Laging Saklolo kundi sa labas din ng Pilipinas. Nawa ay dumating ito sa inyo sa tamang panahon at mapanariwa ang inyong debosyon kagaya ng kayo ay andito sa ating bansa.
Sinabi ni Pope Pious IX sa mga Redentorista noong 1866, “Make Her Known Throughout the World" ("Ipakilala ninyo ang Ina ng Laging Saklolo sa buong mundo.") Ito rin ang ating pagkakataon upang tumulong tayo na higit pa siyang ipakilala sa buong mundo.
Ang nilalaman nito ay hango sa binagong edisyon ng Nobena na ginagawa sa mga simbahang nasa pangangalaga ng mga Redentorista.
Salamat sa mga lumikha ng mga awitin na nakapaloob dito pagbibigay ng kalayaang magamit ang mga ito.
Sana po ay makatulong itong aming munting ambag sa inyo sa pagganap sa inyong debosyon at sa pagpapagalanap pa ng Nobena sa Ating Ina ng Laging Saklolo.
Please Share and Subscribe. Thank you very much!
28 сен 2024
