Txawm tias peb nyob rau lub teb chaws twg, peb yog Hmoob. Tsuav kom peb txhob ntxeev siab rau peb haiv Hmoob es mus tuaj tej mab sua tog rov qab ua phem rau peb cov Hmoob, nyias ua nyias lub neej li cas thiab nyias pab tau lwm leej li cas nyob ntawm nyias txoj kev ua tau thiab txoj kev pab tau. Yog tias sawv daws tseem paub thiab nco qab tias lawv yog Hmoob, peb haiv Hmoob tsuas muaj txoj kev hais ua tsaug rau lawv. Txhob muab ib daim av twg ua ib txoj kev sib faib ntawm peb haiv Hmoob. Peb sib koom tes ces peb sawv tau. Peb sib faib ces peb poob.
