RSG se nuwe vervolgverhaal, DWAALPAD HUIS TOE deur Engela van Rooyen, begin op Woensdag 6 Februarie 2019.
Video deur Luan Jacobs en Francois van Rensburg
Musiek: www.bensound.com
Die skrywer Engela van Rooyen vier later vanjaar haar 80ste verjaardag. Op Woensdag 6 Februarie 2019 begin 'n splinternuwe vervolgverhaal uit haar pen op RSG. "Dwaalpad huis toe" is deur die regisseur Christelle Webb-Joubert in Johannesburg opgevoer.
Die rolverdeling sluit in Rika Sennett-Borthwick, Luan Jacobs, Andre Stolz, Francois Van Rensburg, Mandi Baard, Shemane Harris, Anthony Wilson, Donovan Clyde Pietersen, Tobie Cronjé, Helena Hugo, Pietie Beyers en Susan Coetzer.
Die verhaal begin in die huis van Sofia Bester teen Magaliesberg in Pretoria-Noord. Dis die huis waarin sy en haar (eks-)man Peet kinders grootgemaak het: Juriana, Paridon en Benjan. Die kinders is steeds in die huis by haar, terwyl Peet met sy nuwe (ongewilde) vrou in Kimberley woon. Vanuit hierdie basiese gegewe ontwikkel die intrige, met Peet wat uiteindelik terugkom ... maar op 'n ander manier as wat Sofia gehoop het.
"Dwaalpad huis toe", elke weeksmiddag om 14:45 op RSG, van Woensdag 6 Februarie 2019.
Engela van Rooyen is gebore te Kakamas teen die Oranjerivier. Sy skryf ook onder haar getroude naam Engela Linde. 'n Verdere skryfnaam is Louisa du Toit.
Sy het meer as honderd boeke in verskillende genres geskryf. Heelwat daarvan is bekroon, vertaal en vir skole voorgeskryf. Van haar vroegste werk was radiohoorspele, en daarom beskou sy dit as 'n voorreg dat sy steeds vir die radio kan skryf. Sy het al in 1970 haar eerste prys verower met "Die kokerbome sal dit uitroep". [RSG-luisteraars sal byvoorbeeld radiodramas soos "Wie is bang vir die goeie wolf?" van 2014 onthou.
Sy en haar man het in Pretoria afgetree. Sedert sy onlangse afsterwe bedryf sy steeds haar skryfkantoor.
2 фев 2019
