#1000production #birivar #ramizrovsen
O xarakteri və istedadı ilə fərqli bir şairdir. Ona başqalarının ölçülərindən baxdıqda heç nə alınmır, yəni öz ölçüləri və sistemi var, yazdıqlarını bu parametrlərlə dəyərləndirdikdə çox maraqlı nüanslar meydana çıxır. Biri var. Xalq şairi Ramiz Rövşən.
Ramiz Rövşən 1946-cı il dekabrın 15-də Bakının Əmircan kəndində anadan olub. Əslən Qubadlı rayonunun Teymur Müskanlı kəndindəndir. Suraxanı rayonundakı 208 N-li məktəbdə təhsil alıb. Azərbaycan Dövlət Universitetinin Filologiya fakültəsini və Moskva Ali Ssenari Kurslarını bitirib. Cəfər Cabbarlı adına "Azərbaycanfilm" kinostudiyasında, "Mozalan" satirik kinojurnal studiyasında redaktor, kinostudiyanın ssenari emalatxanasında ssenarist, ssenari redaksiya heyətinin üzvü, kinostudiyanın baş redaktoru, Azərbaycan Tərcümə Mərkəzinin baş redaktoru işləyib. Bir neçə şeir kitabının müəllifidir.
Ramiz Rövşənin ssenariləri əsasında çoxlu sayda bədii və sənədli film çəkilib. Şeir və hekayələri tərcümə edilərək bir sıra keçmiş SSRİ respublikalarında, eləcə də Amerikada, Almaniyada, Böyük Britaniyada, Fransada, Polşada, Bolqarıstanda, Türkiyədə və İranda çap olunub. O eyni zamanda Müsavat Partiyasının 1997-ci ildə qəbul olunmuş himninin sözlərinin müəllifidir.
60-cı illərin sonunda şairin “Bir yağışlı nəğmə” kitabı çap edilib. Bu kitaba düşməyən şeirlər sonradan “Nəfəs” kitabına salınıb. Bu şeirlərdəki hava ilə onun sonradan yazdıqları arasında əsaslı bir fərq yoxdu. Amma sənətkarlıq baxımından püxtələşmə var. 80-ci illərdən başlayaraq Ramiz Rövşənin şeirləri güclü populyarlıq qazanmağa başlayıb. Məlum olub ki, bu şeirlər çoxlarının ürəyindən xəbər verirmiş.
Şair klassik heca şeirinə yeni ahəng gətirib. Xüsusən gəraylılara. Amma özü bunları gəraylı yox, nəğmə adlandırır. Bəziləri isə düşünür ki, Ramiz Rövşən şeiri sosrealist şeirin inkarı kimi maraqlı idi.
Hər şey bir anın içində əks olunur - indiyə qədər rəsmini çəkdiyin, durub yolunu gözlədiyin, tutub bağrına basdığın bütün hislər, ağrı-acılar, fani dünyanın səni qocaldıb muma döndərən sirləri - hər şey bir anın içindən ötüb keçir, tutmaq üçün yox, sadəcə bir anlıq tamaşa üçün... Bu an bitdikdən sonra bütün mümkünsüz şeylər, bütün əlin çatan nəsnələr yenə öz yerini alır. Və sən dərindən-dərinə kədərə batırsan. Ramiz Rôvşən də bir anlıq tamaşa üçün gəlib keçən sirrdir. Hansı ki, onu tutub saxlamaq olmayacaq, amma hər zaman sevgi ilə xatırlanacaq.
O gənclər arasında şeirləri ən çox əzbər bilinən şairdir. Əsərləri asan yadda qalır.
Ramiz Rövşən müsahibələrinin birində belə demişdi: “Beş-altı şeir yazmışam, bunu mənə bağışlamayacaqlar”. Məclislərin birində isə Aqşin Yeniseylə Ramiz Rövşən bir yerdəymiş. İçib keflənəndən sonra Aqşin Ramiz müəllimlə zarafatlaşmaq istəyir:
Şair, nədənsə mən iki yüz içəndə özümdən şeir deyirəm, üç yüz içəndə Vaqif Cəbrayılzadədən, daha çox içəndə sizinkilər düşür yadıma...
Ramiz Rövşən üzünü ofisianta tutub deyir ki
Cavanların arağını bol eləyin!
Bir günsə xaricdə yaşayan soydaşlarımızdan biri Ramiz Rövşənə deyib ki, şeiriniz bizi çətinlikdən xilas etdi. Şair onlardan soruşub: “Bəs şeirlərim məni niyə xilas etmir?”
Hansı ki, yazdığı şeirlər ədibin başına oyun da açıb. Tədbirlərin birində Ramiz Rövşən SSRİ dövründə məhz Allaha tez-tez xitab etdiyi üçün şeirlərinə qadağa qoyulduğunu etiraf edib.
Bir dəfə isə məşhur “Qara paltarlı qadın” şeirindəki qadının kimliyinə aydınlıq gətirib. Onun sözlərinə görə, şeirdəki qadın onun xanımı deyil: “Sözügedən şeirdə qadın kişidən daha yüksəkdə durur. Qadını o qədər alçaltmışıq ki, kişilərlə bərabər etmişik”.
Bir dəfə isə başqa bir imza günündə bir xanım şairin kitabını alıb ona imzaladandan sonra deyib ki, sizə bir kitab hədiyyə etmək istəyirəm.
Nə kitab? - deyə şair maraqla soruşub.
xanım dieta kitabını masaya qoyub deyir : - Mən dietoloqam. Həm də Yazıçılar Birliyinə üzv olmaq istəyirəm.
Ramiz Rövşən gülümsünüb:
Faydasını görsəm, mütləq sizi axtaracam. - deyir
Burada qəribə olan isə o olub ki, qadın özü kök olub.
Ramiz Rövşən müsahibələrinin birində deyib ki: “Bir arzum var - Xalq şairi olmayım, bir vəsiyyətim var - Fəxri xiyabanda basdırılmayım”.
Amma şairin bu arzusu ürəyində qalıb. O bir çox mükafatlara layiq görülüb
70 illik yubileyində Ramiz Rövşənə Ədəbiyyata xidmətlərinə görə mükafat verilir. Yazıçı Anar mükafatı təqdim edəndə deyir ki, TÜRKSOY sənə medal da göndərib. Medalı Ramiz Rövşənin sinəsinə taxmaq istəyəndə şair gülümsəyərək etiraz eləyir: “Sinəm medala öyrəşməyib, sonra taxaram”.
Mirşahin Ramiz Rövşənnən müsahibə götürərkən soruşub.
Elə bir şeiriniz olubmu ki, onu yazandan sonra ayağa durub deyəsiz ki, mən dahiyəm?
Ramiz Rövşənin cavabında deyib.
Xeyr! Çünki heç vaxt dahiliyimə şübhə etməmişəm.
15 окт 2024
