မင်္ဂလာပါ..🕊️
အပတ်စဉ် စနေနေ့တိုင်း တင်ဆက်နေကြဖြစ်တဲ့ “Oak Aw Podcast” ကနေ ပြန်လည်ကြိုဆိုလိုက်ပါတယ်။
ဒီတစ်ပတ်ဆွေးနွေးမယ့် ခေါင်းစဉ်ကတော့ :
📌 “မြို့ပြညရဲ့ သူရဲကောင်းများ” ဆိုတဲ့ခေါင်းစဉ်ပဲဖြစ်ပါတယ်။
ဒီနေ့ ည ဥဩမှာ ပါဝင်ဆွေးနွေးကြမယ့် သူများကတော့ -
• ဒေါက်တာဖြိုးသီဟ
• ကိုဝေယံ
• ကိုဇင်မျိုး
• ကိုနေလင်း
တို့ပဲဖြစ်ပါတယ်။ ရင်ထဲ နက်နက်နဲနဲ ခံစားရတဲ့ အခိုက်တံ့၊ တော်လှန်ရေးမှာ ဒီလိုမတန်တဆ ပေးဆပ်မှူတွေ၊ ဖြူစင်စွာ ရယူလိုမှူကင်းတဲ့ စိတ်စေတနာတွေဟာ ရင်ကိုပြင်းပြင်းရှရှ ခံစားရစေတဲ့ အခိုက်တံ့တွေပါ။ အသံသွင်းရင်း မျက်ရည်တွေလဲ ကျခဲ့ရပါတယ်။
သေချာတာတော့ ဥဩမှာ ပါဝင်သူတိုင်းရော၊ နားထောင်သူတိုင်းရော အတူတူထိုင်ပြီး ပြောနေကြရတယ်လို့ ခံစားမိကြစေတာပါပဲ။ အပတ်စဉ် “Stress Relief” အဖြစ် အကြောင်းရာစုံကို ဥဩမှာ နားဆင်ကြရမှာပဲဖြစ်ပါတယ်။
ဥဩကို အပတ်စဉ် စနေနေ့တိုင်းမှာ #WeSupportMM ယူကျုချန်နယ်၊ မမများနဲ့ ပွဲကမယ် Facebook Page၊ မမပရောဂျက်၏ နိုင်ငံတကာမှ ကိုယ်စားလှယ်ကြီးများ၏ ပေ့ချ်များ၊ ပြည်သူ့မီဒီယာ Facebook Pages မှတဆင့် နားဆင်အားပေးနိုင်ကြပါပြီ။
#OakAwPodcast 🕊️
#တော်လှန်ရေးကြီးပြီးသွားတဲ့အခါ
#WeSupportMM
#မမများနဲ့ပွဲကမယ် 💃🏻💃🏻
▪️▪️▪️▪️▪️▪️▪️▪️
ခုတစ်ပတ် အသံသွင်းစဉ်က ရဲဘော် (၃) ဦးရဲ့ လေးစားစရာစိတ်ဓါတ်၊ ခံယူချက်နဲ့ ဆုံးဖြတ်ချက်တွေအပေါ် လေးစားစိတ်၊ တန်ဖိုးထားစိတ်များနဲ့ ဆရာဖြိုးကို ဆောင်းပါးရေးဖို့ တောင်းဆိုမိသလို ဆရာဖြိုးကိုယ်တိုင်လဲ အဲ့နေ့ညက ရေးခဲ့တဲ့ဆောင်းပါးလေးပါ။
🕊️🕊️🕊️🕊️🕊️
ဥဩ Podcast အတွက် မြေပြင်က ရဲဘော် ညီငယ် ၃ ယောက်နဲ့ အသံသွင်းဖြစ်တယ်။
တော်လှန်ရေးပြီးရင် ဘာလုပ်ကြမယ် တွေးထားလဲ၊ အနာဂတ်အိပ်မက်လေးတွေ ပြောပါဆိုတော့ -
တစ်ယောက်က ဧရာဝတီတိုင်းမှာ တွင်ခံလုပ်ငန်းလုပ်တာ၊ အဲဒါလေး ပြန်လုပ်မယ်တဲ့။ ကိုယ့်ကြောင့် ကိုယ်ချစ်ရသူတွေ စိတ်ဆင်းရဲခဲ့ရတာများလို့ အတိုးချပြီး ပြန်လုပ်ပေးမယ်တဲ့။
နောက်တစ်ယောက်က အမေနဲ့ ညီမလေးကို အိမ်ပိုင်လေးနဲ့ ထားချင်တယ်တဲ့။ သူက ထိခိုက်ဒဏ်ရာ ရထားလို့ ထမင်းတောင် သူ့ဟာသူ မစားနိုင်တော့တဲ့သူ။ အလုပ်ပြန်လုပ်ဖို့ သိပ်မလွယ်လို့ အိမ်ဆိုင်လေး ဖွင့်မယ်တဲ့။
နောက်ဆုံးတစ်ယောက်ကတော့ ခု RU-vid ကနေ ဟင်းချက်တဲ့ ဗီဒီယိုလေးတွေ ကြည့်ကြည့်ထားတယ်။ နောင်ကျ ထမင်းဆိုင်လေး ဖွင့်မလို့တဲ့။
ရိုးရှင်းလိုက်တာ။ ဒါ တော်လှန်ရေးမှာ မိသားစုတင်မက ကိုယ့်အသက်ကိုပါ ထည့်မစဥ်းစားဘဲ ပါဝင်နေတဲ့ လူငယ်တွေရဲ့ အနာဂတ်စိတ်ကူးတဲ့လား။ ရယူပိုင်ဆိုင်လိုတာ ဘာတစ်ခုမှ မရှိဘူး။ ဘယ်သူဘယ်ဝါရယ်တောင် ဘယ်သူကမှ သိပ်သိကြတာ မဟုတ်ဘူး။
တော်လှန်ရေးကို အသုံးချပြီး နေရာယူလိုသူတွေ၊ အာဏာယူလိုသူတွေ၊ နာမည်တည်ဆောက်လိုသူတွေ ရှက်တတ်ရင် လဲသေဖို့တောင် ကောင်းတယ်။
ဒီကာလပြီးသွားလည်း ကျနော်တို့တာဝန် မပြီးသေးဘူးနော်။ ဒီလိုလူငယ်တွေအတွက် အများကြီး ကူကြရလိမ့်ဦးမယ်။ နောက်ကျနေတဲ့ ပညာရေး၊ အသက်မွေးဝမ်းကျောင်း အတတ်ပညာကစလို့ စိတ်ပိုင်းဆိုင်ရာ ဒဏ်ရာတွေအထိပေါ့။
(အဲဒီကျမှ တချို့တွေ Myanmar Celebrity တို့ ဘာတို့ကို ခေါ်လာပြီး Personal Branding လုပ်ကြဦးမှာလည်း မြင်ယောင်သေးတယ်။)
အဆုံးမှာတော့ ကျနော်လည်း ပြောလိုက်ပါတယ်။ ကို - - ရဲ့ တွင်ခုံလုပ်ငန်းလည်း လာလေ့လာမယ်။ ကို - - ရဲ့ အိမ်ဆိုင်လေးလည်း လာအားပေးမယ်။ ကို - - ရဲ့ ထမင်းဆိုင်မှာလည်း လာစားမယ်လို့။
လူချင်းတောင် မမြင်ဖူးတဲ့သူတွေနဲ့ ဆွေမျိုးရင်းချာလို ခံစားလာရစေတဲ့ ကာလပါ။ ဒါကြီး ပြီးသွားရင် ဆုံကြမယ်နော်။ တစ်ခါပြန် မိတ်ဆက်ကြမယ်။ ဘယ်နာမည်ဝှက်နဲ့က ဘယ်သူဆိုတာမျိုးပေါ့။ ဒီနှစ်တွေအတွင်း တွေ့ကြုံခဲ့ရတာတွေကို ပြန်ပြောကြမယ်။ ရယ်စရာတွေ မျှဝေမယ်။
အဲဒီမတိုင်ခင်တော့ တစ်ယောက်ကိုတစ်ယောက် ဖေးမရင်း အားတင်းထားကြရအောင်နော်။
ကျနော်ယုံကြည်ပါတယ်။ အဲဒီလို ကျနော်တို့ ညီအစ်ကိုမောင်နှမတွေ ပြန်ဆုံကြတဲ့နေ့ဟာ မလွဲမသွေ ရောက်ကိုရောက်လာမှာပါ။
လူဆိုတာ မျှော်လင့်ချက်နဲ့ အသက်ရှင်ရတာပဲ မဟုတ်လား။
ဒေါက်တာဖြိုးသီဟ
၁၄.၇.၂၀၂၃
Now
5 окт 2024