OKMK futbol klubi yangi futbolchilarni tanishtirdi✅
26-fevral kuni qadrdon jamoamiz, OKMK sport majmuasida yangi mavsum oldidan taqdimotini o‘tkazdi. Unda o‘tgan yillarda jamoamizda yorqin o‘yinlar namoyish etgan futbolchilar va yangi mavsumdan eʼtiboran klubimiz tarkibiga kelib qo‘shilgan bir qator mahalliy hamda legioner ijrochilar tanishtirildi.
Tadbir avvalida OKMK futbol klubining Prezidenti Abdulla Xursanov so‘zga chiqib, futbolchilarimizga omad va zafarlar tiladi. So‘ngra, jamoamiz bosh murabbiyi Mirjalol Qosimov bilan birgalikda o‘zbek brendi ostidagi «7SABER» kompaniyasi tomonidan ishlab chiqarilgan OKMK PFKning maxsus formalarini futbolchilarga tantanali ravishda topshirishdi.
OKMK jamoasining eng katta yutug‘i - uni o‘ziga xos fidoyi muxlislari borligidir. Ularning bir qanchasi ushbu tadbirda ishtirok etib, har qanday vaziyatda jamoa bilan birga ekanligini va doimo qo‘llab-quvvatlashini taʼkidlab o‘tdilar.
Eslatib o‘tamiz, OKMK futbol klubi yangi mavsum oldidan 3 nafar legioner: Gruziyalik yarim himoyachi Giorgi Papava, Serbiyalik markaziy hujumchi Milyan Shkrbich va Yaponiyalik hujumkor yarim himoyachi - Arihiro Sentoku kabi futbolchilar jamoa tarkibiga jalb etildi.
Shuningdek, o‘tgan mavsumda Superliga jamoalarida to‘p tepgan tajribali va yosh isteʼdod egalari: Murodjon Toshmatov, Javohir Ilyosov, Avazbek O‘lmasaliyev, Ali Abdurahmonov, Azizbek Xolmurodov, Asadbek Rahimjonov, Azizbek Bahromov, Saidafzalxon Ahrorov va Abrorbek Sarimsoqov hamda Farruxjon Qodirovlar bilan shartnoma tuzildi.
Umid qilamizki, tarkib jihatdan yosh va yangilangan «konchilar» 2024-yilgi futbol mavsumida yuqori o‘rinlarni egallab, muxlislar ishonchini oqlaydi.
21 сен 2024