Bizim hazırda dayandığımız yer Qobustan rayonu Şıxlar kəndidir. Şıxlar sözü şeyxlər sözünün yumşaldılmış formasıdır.
Şıxlar, Xilmilli sovetliyinə aiddir. Hazırda kənd atılmış sayılır. Xızı və Qobustanın bir çox kəndi kimi bura urbanizasiya nəticəsində boşalıb. Bu kəndə Xilmillidən gəlmək olar, ancaq bu yol çox çətindir və gediş - gəliş yox dərəcəsindədir.
Kənd çox gözəldir və maraqlıdır. Yaşayış evləri üzərindəki əksər tarixlər keçən əsrin 60-70-nci illərin göstərir lakin yaşayış 2000-ci illərə kimi davam etmişdir. Kənd ətrafında mağaraların bolluğu, buranın qədimdən məskunlaşdığına əsas verir. Səbəb olaraq hətta bu mağaralardan birinin dövlət tərəfindən qorunduğunu da deyə bilərik.
Kənddə dəqiq tarix göstərilməsə də pir də var. Bundan əlavə kəndin yaxınlığındakı mağaralarla bərabər, yaxınlıqdakı yüksəkliklərdən ətrafa gözəl mənzərə açılır.
Kənd ərazisində çoxlu bulaq axır. Bu bulaqların suyu birləşərək sonradan Qozluçaya birləşir.
Kənd sivilizasiyadan uzaq olsa da hiking və ya düşərgə üçün çox gözəl yerdir. Qobustan rayonun digər kəndləri kimi heç olmasa ömürdə bir dəfə görülməli yerdir.
12 дек 2020
