Rênas Jiyan Tu Neyê Ez ê Bimrim 

tu neyê ez ê bimirim
jixwe ez ê tim bimirim tu bê jî, tu neyê jî
jixwe tu jî pê dizanî
di me gişan de heye mirineke kesidandî,
gidîîiî gidî
îcar jî tu bidîta vî canî
heger weke zarokekî çavên wî ji kefa sabûnê bişewitiyana jî
ne xem bû êdî
gulleyên bencxwarî
li ser zikê wî
weke girekî
têrreke bûda yî jê re çêkira jî
tu neyê ez ê bimirim
jixwe ez ê tim bimirim tu bê jî, tu neyê jî
lê heger dîsa jî
tu nexwazî ku stranan bixeyîdînî ji giyanekî kurmî,
bi girî ve bikî dilekî gurrî,
nehêlî ku tevnepîr konê xwe vedin li hembêzeke hedimî
û êvaran bicehemînî ji temenekî meliqî
nebî nebî!
tu neyê ez ê bimirim
lê heger tu werî, çavên te wê ji min re bibin tirî
zivistanî, henekên te wê ji min re bibin hirî
qayîl im, bila bi hatina te ez bibim gayekî
ku di xelayê de kêran qeşmeriyên xwe pêkirî
bibim berbangeke şevlêherrimî
û hechecîkekî sêrjêkirî
Rênas Jiyan