2014-yilgi saylovlar arafasida bo'lib o'tgan debatdan kichik parcha.
O'shanda UzLiDeP partiyasiga “Nima uchun partiya saylovdan oldingi va’dalarini bajarmadi” deya savol berganman. Debatdan keyin "katta akaxonlarning" ko’pchiligi, “Prezident saylangan partiyaga bunaqa savol berib bo’lmaydi, bu bilan sen Prezidentni ham va’dabozga chiqarib qo’yding, endi o’zingga yomon bo’ladi” deb rosa qo’rqitishgan (u paytlarda bunday talqin juda qo’rqinchli edi har holda).
Baxtli tasodif tufaylimikin, menga hech qanday yomonlik bo’lmagan, Xudoga shukr. Baxtli tasodif deganimning sababi, bizning debat saylovdan oldingi eng oxirgi debat edi. Ungacha bo’lgan debatlar davlat rahbariga yoqmagan, “nega tanqid yo’q, faqat quruq gaplar” deya mas'ullarga e’tiroz bildirgan. Shu sababli bizning debat syomkasiga Prezident Devonidan bir nechta vakillar hamda shaxsan MTRK raisi Alisher Xodjayevning o’zi kelgandi. Ular bizga “Bemalol tanqid qilaveringlar, chiqaramiz” deyishgan. Va rostdan debatda aytilgan barcha gaplarni deyarli kesmasdan efirga berishgan.
Xullas, shu sababli tanqidlarimiz ekran yuzini ko’rgan va tanqid aytganlarga keyinchalik yomonlik qilishmagan.
Xayriyatki, hozir holat keskin o’zgargan. Partiya vakillari siyosiy debatlarda bir-birini yoki Prezident saylangan partiyani tanqid qilishga ruxsat olish uchun Devondan odam kutishmayapti, MTRK raisi tepasida turmayapti, partiyalar turli mavzularda o’z pozitsiyasini bildirish uchun tegishli idoralar bilan oldindan kelishmayapti (menimcha shunaqa), partiya raislari ayrim qonunlarni qo’rqmasdan “Konstitutsiyaga zid” deb baralla aytishyapti… Shunaqa erkinlik bo'lgani uchun ham ba'zan "qovun tushirishlarni" ham ko'ryapmiz, bu ham tabiiy hol, menimcha. Xullas, ahvol ancha yaxshilangan.
Aytgancha, siyosiy debatlarda partiyalar 2 ta yo’nalishda bir-biri bilan ko’proq “jang” qilishlarini istar edim. Birinchisi, kimning hozir taklif qilayotgan saylov dasturi xalqqa foydaliroq. Ikkinchisi, o’tgan safardagi va’dalarni kim bajardi, kim bajarmadi. Bu bannerlardagi shiorlar yoki imlo xatolari ustida tortishgandan yaxshiroq. IMHO.
#saylov #debat #xushnudbek #xudoyberdiyev #2014
Ijtimoiy tarmoqlardagi sahifalarim:
Telegram kanal: t.me/xushnudbek
Instagram: / xushnudbek
Twitter: / xushnudbeck
Facebook: xushnudjohn
5 сен 2024
