SHIPHEW NGUT IOH LYNGDOH BATHYMMAI KA BALANG KATHOLIK, SHILLONG 

U Most Rev Archbishop Victor Lyngdoh, DD, Lyngdohsad ka Shillong Archdiocese ha ka jinglehniam bashongkun bad bashongblei kaba la sdang ha ka por 1.00 nohsngi ha ka 20 tarik Kyllalyngkot ha Iingmanebah Laitumkhrah u la pynkyntang Lyngdoh Sohblei bathymmai shiphew ngut ki rang kynsai jong ka Balang Katholik.
Ka Iingmanebah, Laitumkhrah ka la shlei mam da ki paid riewngeit Katholik kiba la wan na kylleng ki shnong, ki phadar, ki sister, bad kiba haiing hasem jong ki 10 ngut ki dikon kiba la raikut ban aiti ialade shi jingim na ka bynta ki kam shakri ia u Blei bad ia ka Balang ha kane ka sngi.
U Rev Phadar Richard Majaw, Vicar General, Shillong Archdiocese u la ieng sakhi bad aiti ia kine ki 10 ngut ki dikon hakhmat u Lyngdohsad ba ki la long kiba bit dor ban pynkyntang Lyngdoh Sohblei ia ki.
Na ki 10 ngut ki Lyngdoh Sohblei bathymmai ka seng riewniam Salesian u Don Bosco (SDB) ka la ioh 7 ngut, katba ka Shillong Archdiocese ka la ioh 3 ngut.
Ki 7 ngut na ka seng riewniam Salesian ki long, Rev Phadar Anthony Kharbuki (Marbisu), Phadar Albert Tron Mawa (Upper Shillong), Phadar Kambor Singh Sunn (Marbisu), Phadar Khlainbor Warjri(Pynthorumkhrah), Phadar Rueben Lyngdoh(Nongthymmai), Phadar Sawlus Kharpran (Mawlai), Phadar Synshar Kharsyntiew (Mairang).
Katba ki Lyngdoh Sohblei na ka bynta ka Shillong Archdiocese ki long Rev Phadar Felix Aiban Klein (Nongpoh), Phadar Kynsai Kurbah (Mawbri) bad Rev Phadar Lamphranglingkand Dkhar (Umkadhor).
Ha kane ka jinglehniam, u Lyngdohsad u la sneng la kraw ia ki 10 ngut ki Lyngdoh Sohblei bathymmai ba ki dei ban bud ia ka nuksa jong u Jisu Khrist, u Lyngdoh Rangbahduh ban long ki nongsharai babha ia ki paid jong U. U la pynshlur ruh ia ki ban long kiba kloi ban pha bad ban aiti ia la ka jingim, na ka bynta ki langbrot kumba la pyni nuksa da u Jisu Khrist U Nongpynim jong ngi.
Ki paid riewngeit Katholik ki la rhem ka mynsiem, haba u Lyngdohsad u la kyntu ia ki ban duwai bad ban ieid ia ki Lyngdoh kiba trei met bad mynsiem na ka bynta jong ki.
Peit ia ki program ba bun bah jong ka Don Bosco Media Network TV
1. Local Cable LCN Channel 279
2. RU-vid Channel
3. OTT @ dbmnTv
4. Ha ka website: donboscoshillong.org
#Khuborjylla #khasinews #khuborkhasi #NewsFromMeghalaya​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​ #donboscomedianetwork #KSU #NEHU #Shillong #dbmnTv #Khubor #Shillong #donbosco #Samla #Youth
Follow us on:
Facebook: profile.php?...
Instagram: / db_media_network_shillong