Savol: Erkak yo ayolning sochi, qoshi yoki kipriklari toʻkilsa, ularni ektirish joizmi? Javob: Alhamdulillah… Soch, qosh va kiprik ekish amaliyoti, bizga maʼlum boʻlishicha, inson tanasining bir qismidan soch tolalarini olib, boshqa qismiga koʻchirish orqali amalga oshiriladi. Agar soch, qosh yoki kiprik muayyan bir kasallik tufayli yoki irsiy (yaʼni qonida, avlodida) boʻlgani uchun yoki bundan boshqa sabablarga koʻra toʻkilgan boʻlsa, davolanish maqsadida ularni ektirish joiz. Bunga Arfaja ibn Asʼaddan rivoyat qilingan hadis dalil boʻladi. Arfaja aytadi: “Johiliyat davrida Kulob jangida burnim kesildi. Shundan keyin kumushdan burun yasatib oldim. Biroq u (yiringlab) yomon hid chiqara boshladi. Shunda Rasululloh sollallohu alayhi va sallam oltindan burun yasatib olishimga buyurdilar” [Termiziy: 1770. Shayx Alboniy sahih degan]. Endi, Imom Buxoriy (5931) va Muslim (2125) Ibn Masʼud roziyallohu anhudan rivoyat qilgan: ““Vashm” qiluvchi va “vashm” qildiruvchi, qosh teruvchi va terdiruvchi hamda husn uchun tish orasini ochuvchi, Allohning yaratganini oʻzgartuvchi ayollarni Alloh laʼnatlasin!” degan hadisiga kelsak, Imom Navaviy rohimahulloh ushbu hadisni sharhlab shunday deydi: ““Husn uchun tish orasini ochuvchi”, yaʼni chiroy talabida Allohning yaratganini oʻzgartirib, tishlari orasini ochuvchi ayol. Hadisda mazkur ishni chiroy talabida qilish haromligiga ishora qilinmoqda. Ammo davolanish yoki tishdagi bir aybni ketkazish uchun tish orasini ochishga ehtiyoj tugʻilsa, buning ziyoni yoʻq” (“Sharhi muslim”, 14-juz, 107-bet). Demak, inson tanasidagi noodatiy koʻrinishni ketkazish maqsadida undagi ortiqcha aʼzoni olib tashlashi yoki noqis boʻlgan aʼzoni qoʻshishi joiz boʻlib, bu Allohning yaratgan xilqatni (koʻrinishni) oʻzgartirish sanalmas ekan. “Islom fiqhi akademiyasi” hijriy 1428 yil, jumodul-uvlo oyining 24- va 29-kunlari (milodiy 2007 yil, iyul oyining 9- va 14-kunlari) Malayziya davlatida plastik jarrohlik amaliyotiga bagʻishlangan oʻn sakkizinchi yigʻilishida quyidagi qarorga keldi: “Plastik jarrohlik amaliyoti quyidagi holatlarda joiz boʻladi: a) tanani yaratilgan paytidagi asl holatiga qaytarish maqsadida. Zero, Alloh taolo: “Darhaqiqat, Biz insonni eng goʻzal koʻrinishda yaratdik”, deb aytgan; b) tana aʼzolari odatda bajaradigan vazifani tiklash maqsadida; v) tugʻma ayblarni toʻgʻirlash maqsadida. Masalan, ikkiga ajralgan labni, oʻta qiyshiq burinni, xollarni, ortiqcha barmoq yoki tishni, bir-biriga yopishib qolgan barmoqlarni, agar bular insonga moddiy yoki maʼnaviy zarar keltirsa, plastik jarrohlik amaliyoti bilan tuzatish joiz; g) kuyish, avtohalokat, kasallik va bundan boshqa ofatlar natijasida keyinchalik paydo boʻlgan ayblarni tuzatish maqsadida. Masalan, ehtiyoj tugʻilgan joyga teri tikish yoki yamash, koʻkrak butunlay yoʻq boʻlib ketsa, asl holatiga qaytarish yoki koʻkrak hajmi kichik yo katta boʻlsa, qoniqarli koʻrinish hosil boʻladigan darajada qisman oʻzgartirish uchun plastik jarrohlik qildirish joiz. Shuningdek, soch toʻkilish holatida soch ektirish, xususan, ayol kishilarga ruxsat”. Shayx Ibn Usaymin rohimahullohga quyidagicha savol yoʻllangan edi: “Soch toʻkilish dardiga duchor boʻlgan odam boshining orqa qismidan soch tolalarini olib, toʻkilgan qismiga ektirishi joizmi?” Shayxning javobi quyidagicha boʻldi: “Ha, joiz. Chunki bu ish tanani Alloh taolo yaratgan asl xilqatga (koʻrinishga) qaytarish va undagi aybni ketkazish hisoblanadi. Alloh taolo yaratgan xilqatga qoʻshimcha narsa qoʻshish yoki goʻzallik talabida uni oʻzgartirish emas, balki inson oʻzidagi kamchilikni toʻldirish va aybni ketkazish durust sanaladi. Uch kishi haqida aytilgan hadis koʻpchilikka maʼlum boʻlsa kerak. Ularning biri kal boʻladi. Farishtadan Alloh taolo unga soch ato etishini soʻraydi. Shunda farishta uni silaganda Alloh azza va jalla unga goʻzal soch ato etadi. (Bundan inson tanasidagi aybni ketkazish maqsadida saʼy-harakat qilishi joizligi kelib chiqadi)” (“Fatovo ulamoil-baladil-harom”, 1185-bet). Shayx rohimahulloh zikr qilgan hadisni Buxoriy, (3277) va Muslim, (2964) rivoyat qilgan. Bir insonning soch tolalarini olib boshqa insonga ekish haqida IslamQA veb sahifasi ulamolaridan soʻrashganda, quyidagicha javo berishgan: “Zohiridan ekilajak soch tolasi insonning oʻz tanasidan olinishi yoki boshqa inson tanasidan olinishi oʻrtasida farqi yoʻq, ikkisi ham joiz”. Eslatma: Soch, qosh yoki kiprik ekish yuqorida aytib oʻtilganidek, inson koʻrinishiga salbiy taʼsir qiladigan yoki noqulaylik keltirib chiqaradigan holatlarda joiz boʻladi. Ammo noodatiy koʻrinish hosil qilmaydigan yoki noqulaylik tugʻdirmaydigan darajada toʻkilgan boʻlsa, u holda bu ishga qoʻl urmay, Alloh azza va jalla nasib qilgan miqdorga qanoat qilish maqsadga muvofiq. Vallohu aʼlam. Ushbu fatvoni tayyorlashda Islamweb va IslamQA veb sahifalaridan foydalanildi. ixlos.org/14310/
Assalomu alaykum brodarlarim Allohga omonatsiz Allohim sizni Oʻz rahmatiga olsin Allohim hammamizni oʻzini xolis bandalaridan qilsin Va shunday ustozlarni Alloh mukofotlasin
@@muhammadaliqosimov6562 Assalomu alaykum brodar bu gapim hammaga ahli musulmonlarga yaʼni Alloh taolo bizni agar oʻz rahmati bilan oʻramasa bu dunyoda yashashdan maqsad nima
Asalomu alaykum mening ham 1 ta savolim bor qoshlarim tòkidi biron bir kasaligimda yòq yoshim 25 da oz qoshlarim qoldi harkuni qoshlarimni bòyab yuraman erimning kòziga xunuk kòrinishni istamayman qoshlarim tòkilgan yerlariga ektirsam bòlamadimi
Assalamu alaykum admin soqol haqida savolim bor edi soqolim faqat iyyagim dan chiqadi aytshlaricha maz bor ekan ushani yuzga surtsa soqol chiqarkan Shu mazdan foydalansam buladimi