Sousanna Siradeghyan - Elinar (Armenian folk song) 

Աշուղ Շահենի «Էլինար» երգն է՝ Սուսաննա Սիրադեղյանի կատարմամբ:
Читайте на русском языке: • Сусанна Сирадегян - Эл...
Սա սիրավառ մոր գովքն է իր դստեր՝ Էլինարի մասին: Առավոտ կանուխ, այն պահին, երբ Աղոթրանը՝ արևելքը սկսում է լուսավորվել, նա լուսաբացին ձայն է տալիս իր գեղեցիկ աղջկան, ասելով, որ ռանչպարն արդեն արտ է գնացել, ոչխարի հոտը՝ սար, ուրեմն իրենց ոչխարն էլ պիտի հանել, միացնել գյուղի հոտին:
Հաջորդ տան մեջ մայրն Էլինարին հորդորում է մազերը հինել: Նա հրճվում է, որ դուստրն արդեն այնքան է մեծացել ու հասունացել, որ կուրծքն ընդգծվում է զգեստի տակից, և նրան ուղարկում է աղբյուրից ջուր բերելու:
Վերջին տան մեջ մայրն ասում է, որ երկնքում արդեն լուսաստղը միայնակ է շողում, այսինքն մոտ է արևածագի պահը, և կանչում է աղջկան վեր կենալու անկողնուց ու զգեստները հագնելու: Ապա սկսում է լուսաբացի մի աննման գեղեցիկ, բանաստեղծական նկարագրություն երգել. ցողը հալվում է վարդի թերթերին, սոխակն է պարտեզում գեղգեղում, իսկ հովիվը, իր անուշ երգով արդեն հոտը հավաքել, բարձրացել է սարեր: Եվ ահա, Էլինարը եկել, մարագ է մտել, որտեղից պիտի կուժը վերցնի, գնա աղբյուրը՝ ջրի:
Երգի խոսքերը՝
Գարուն է, սիրուն է,
Լուս բացվավ Աղոթրանէն,
Աղջի լաո՛, Էլինար,
Վեր կաց, ոչխարը հանենք,
Սուրուն քաշվավ, էլավ սար,
Արտը գնաց ռանչպար:
Իմ Էլինար, մազերդ հինե,
Դու անգին ես, քե մատաղ,
Լաո, քըզի մեռնի մարեն,
Ջուխտակ դդումներ կը հարեն,
Առ խորոտ գավ, գնա աղբուր,
Ջուր առ, արի բարձրիկ սարէն,
Մատաղ էղնի քըզի մարեն:
Ջուր առ, արի մարմար քարէն,
Մատաղ էղնի քըզի մարեն:
Լուսո աստղը էլավ,
Վեր կացի, դու հագի հալավ,
Շաղը վարդի վրեն հալավ,
Բլբուլի ձեն դուրալի, լավ,
Հովիվն անուշ երգեց, պրծավ,
Իմ Էլինար մարագն էկավ:
Վերու, գնա մարմար աղբուր,
Ջուր առ, արի բարձրիկ սարէն,
Մատաղ էղնի քըզի մարեն:
Ջուր առ, արի մարմար քարէն,
Մատաղ էղնի քըզի մարեն:
Ծանոթագրություններ____________________________________
Աղոթրան - արևելք
Սուրու - ոչխարի հոտ
Հալավ - հագուստ, զգեստ