Cənub rayonlarında tərəvəzçiliklə məşğul olanlar əkdikləri şitillərin kütləvi şəkildə ilbizlərin hücumuna məruz qaldığını bildirirlər. Bir çox əkinçilər ilbizlərlə adi üsullularla mübarizə aparsalar da bəziləri bu zərərvericilərə qarşı effektiv dərman axtarışındadır.
Öz şəxsi təsərrüfatında müxtəlif tərəvəz bitkilərini əkən Ağakərim Məmmədov deyir ki, gecələr ilbizlər bağda əkilən şitillərin gövdəsini qırmaqla onları məhv edirlər. Gündüz rast gəlinməyən bu zərərvericilər gecə saatlarında torpağın nəm və şehli olmasından istifadə edib əkilmiş sahələrə ziyan vururlar. Təsərrüfatçı hər gecə bostandan vedrə dolusu ilbiz yığıb öldürdüyünü deyir.
Ağakərim Məmmədov - təsərrüfat sahibi
“Axşam saat 10-11 arası giririk bağa və gecə saat 2-yə qədər bağda oluruq. Ətrafdan yığırıq yenə azalmır. Əvvəllər yığardıq ardı kəsilərdi.”
Əkinçiliklə məşğul olanlar bildirir ki, ötən illərlə müqayisədə bu kimi zərərvericlər bu il daha çoxdur. Təsərrüfat sahibləri çılpaq ilbizləri əkin sahəsindən dəf etmək üçün bəzi üsullara əl atıblar.
Ağakərim Məmmədov - təsərrüfat sahibi
“Ağacın yonqarın sexlərdən gedib gətirirəm. Səpirəm bağa. Onun da xeyri olmur. Yerdən yenə çıxır.”
Məsələyə münasibət bildirən Lənkəran Bölgə Təcrübə Stansiyasının elmi işçisi bunu müxtəlif amillərlə əlaqələndirdi.
Azər Cəlalov - Lənkəran Bölgə Təcrübə Stansiyasının elmi işçisi
“Əsasən erkən yazda çılpaq ilbizlər çox ziyan vurur. Onlar əsasən nəmli və yağmurlu havanı çox sevirlər və həmin vaxtı daha çox qidalanırlar. Qışda da havanın nisbətən isti keçməyi bu zərərvericilərin artımına şərait yaradır.”
Mütəxəssislər ilbizləri məhv etməyin daha effektli yolunun kimyəvi dərmanların tətbiqi olduğunu bildirir. Amma...
Azər Cəlalov - Lənkəran Bölgə Təcrübə Stansiyasının elmi işçisi
“Aqrotexniki üsullardan istifadə etmək daha məsləhətdir. Onların avqust ayında çoxalma dövrüdür. Bu dövrdə hava şəraitini nəzərə almaq lazımdır. Şumlama işi tez aparılmalıdır.”
Bununla yanaşı çılpaq ilbizləri əkin yerlərindən uzaqlaşdırmaq üçün alaq otlarını təmizləmək və əkilən şitillərin ətrafına şam və ya akasiya bitkisinin iynələrini səpələmək də olar.
6 сен 2024
