#TalkFood 

今次好榮幸收到臺灣觀光協會嘅邀請，TalkFood終於可以衝出香港，參加呢一次台灣味覺療癒之旅！重點係：6日5夜嘅行程，去勻台北、台中、台南、高雄同屏東5個地方，食足23間餐廳，當中仲有米芝蓮餐廳，真係好期待呀！
公費食住玩，遊勻成個台灣，係唔係覺得好歎呢？結論是：原來由飲食記者變做旅遊記者真係唔容易！
雖然好攰，但呢6日5夜所體驗到嘅，絕對新奇有趣，行程超緊湊，竟然10分鐘食晒食個餐！早餐啱啱食完，即刻食超豐富嘅日式燒肉，晚餐繼續殘廢餐食火鍋；最誇張係其中一日食5餐……食得太多，太飽，係會眼神死。不過，當中唔少餐廳嘅體驗，真係100分。行程頭幾日，去咗十幾間特式餐廳，第一集先精選幾間心水餐廳俾大家bookmark低，下次去台灣非常值得跟住去食～
第一間：透明車頂靚景下午茶 @臺北市雙層餐車
臺北市雙層餐車係全台灣第一架雙層用餐巴士，巴士上層採用全景透明車頂，沿途見到台北市著名景點：陶朱隱園、台北101、Apple旗艦店、東區商圈等，陽光明媚天氣好的話，一邊涼住冷氣嘆下午茶，一邊望住頭頂窗外風景，真係幾chill吓㗎～今個季度，臺北市雙層餐車同台北遠東香格里拉酒店合作，推出「戀夏午茶」下午茶套餐，仲有隻可愛恐龍生吐司，影相打卡就啱晒～
臺北市雙層餐車
地址： 110台灣台北市信義區忠孝東路五段68-2號
第二間：對症下藥 即時調配涼茶 @laojianm
老濟安創立於1972年，以售賣青草茶（即台灣嘅涼茶）為主，除咗可以直接到鋪頭買現成嘅青草茶飲，最特別係，呢度仲提供客製化嘅涼茶。老闆將草藥店重新打造，變成很文青風格嘅吧枱形式，拉近同客人嘅距離。想飲杯啱自己體質，又有調理功效嘅涼茶，客人先填寫一份診斷書，例如：會詢問睡眠質素、早上鼻炎情況、皮膚痕癢等問題，然後老闆會了解客人嘅身體狀況，口味喜好等，對症下藥，即時調配出一杯專屬嘅青草茶。若本身有任何身體狀況嘅問題，都可以順道詢問。Y小編請教老闆之後，真係獲益良多，解決咗唔少健康嘅疑惑。呢度嘅涼茶可以揀苦/唔苦，當然飲唔苦，入口真係一啲涼茶嘅甘苦味都冇，反而較清香，呢個體驗特別之餘，仲好有記憶點，一定要試吓～
老濟安Healing Herbar
地址： 108台灣台北市萬華區西昌街84號
第三間：創意客家台菜素食 @ monsoontaiwan
Monsoon係一間預約制餐廳，主打創意客家素食台菜，呢度嘅素菜，配搭新奇有趣，由造型到擺盤，真係靚到嘩嘩聲，食物質素高，唔單止味覺滿足，喺呢度食嘢，「五感」體驗特別，真係有種治癒嘅功效。尤其係同店主交流後，聽完佢講嘅說話，好似上咗一堂人生哲理課，每講一句都起晒雞皮，食餐飯令你獲益良多，享受一次獨特嘅用餐體驗。到底呢餐飯係點？記住要睇片啦～
Monsoon（reservations only)
地址： 111台灣台北市士林區文林路126號3樓
第四間：台南最靚café @thepooltainan
位於台南市美術館2館嘅南美春室，務必加入你下一次嘅台南之旅嘅行程入面，置身於玻璃屋般嘅複合式餐飲空間，無遮擋360度風景，稱得上係台南最靚cafe TOP 1！呢度嘅日光絕對係最好嘅畫筆，隨便影一張相，都會令你大大力去感嘆：「點解可以咁靚！」今次試咗佢哋嘅芒果冰船雞蛋仔，打卡打到啲雪糕融晒，不過配住靚景，點都好食！
南美春室 The POOL
地址：700台灣台南市中西區忠義路二段1號5F
第五間：唔駛$100食到溫體牛@阿裕牛肉涮涮鍋
呢間係出名食溫體牛嘅火鍋店，溫體牛係指即日新鮮屠宰切割，未經過低溫冷藏嘅牛肉。我諗喺香港食真正嘅溫體牛，人均起碼超過$500，但喺台南食，一人份嘅溫體牛肉，竟然唔超過港幣$100！？咁感人嘅價錢，梗係要食盡佢啦！溫體牛肉只需要涮3-5秒就夠啦，食嗰陣，牛肉呈粉嫩嘅顏色，入口新鮮軟嫩，比起平時食嘅牛肉會更有韌勁，肉味更濃，加埋火鍋個牛肉湯底，真係超值得過份，嚟台南一定要bookmark呢間溫體牛火鍋店！
阿裕牛肉涮涮鍋(崑崙店)
地址： 717台灣台南市仁德區崑崙路733-1號
食住咁多先，嚟緊下一集仲有好多精采景點同餐廳，同埋蝦碌趣事發生，記得下個星期準時RU-vid睇片！
大家平時去台灣又會點玩點食？歡迎留言話我聽^^
主持、撰文：Yvonne Lam
攝影、剪接：Doris Wong
美術：Anita Lam
鳴謝：臺灣觀光協會香港辦事處 @ taiwan_ttbhk
TalkFood 先填飽肚子再前進
RU-vid : / talkfood
Facebook : / talkfood
Instagram : ...
#TF衝出香港 #臺灣觀光協會香港辦事處 #台北 #台中 #台南 #臺北市雙層餐車 #老濟安 #青草茶 #Monsoon #客家菜 #素食 #預約制餐廳 #米芝蓮
#南美春室 #臺南市美術館2館 #台南最靚cafe #阿裕牛肉涮涮鍋 #溫體牛 #火鍋 #台灣 #台灣美食 #台灣旅遊 #老字號 #下午茶 #TalkFood #TalkFood台灣
延伸閱讀
#TalkFood【#18區搵食-上大帽山飲早茶初體驗！全自助式飲茶試過未？】朝聖端記茶樓｜必食茶果同奶黃流心馬拉糕｜300度荔枝柴窯燒雞｜雞皮堅焦脆｜必配桂花車厘茄｜荃灣老字號糖水｜芝麻湯丸100
• #TalkFood【#18區搵食-上大帽山飲...