Halovat yo'q o'zga ellarda, Uyga ketgim kelyapti Ona. Sayoq yurmay yomon yo'llarda, Uyga ketgim kelyapti Ona. Yopgan nonlar, qatiq go'jalar, Qadrdonlar, yoru jo'ralar, Pashsha talasa ham kechalar, Uyga ketgim kelyapti Ona. Musofirni ko'rdik yetar-da, Bu kunlar ham o'tar ketar-da, Ro'zg'or kami bir kun bitar-da, Uyga ketgim kelyapti Ona. Nevaralar o'ynating Siz ham, Kelin bilan choylashing Siz ham, Qanot yozib hoziroq birdan Uyga ketgim kelyapti Ona. Qarindoshlar yo'qlar kun sayin, Ayrimlari unutgani tayin, Keyin ketish bo'lmasdan qiyin, Uyga ketgim kelyapti Ona. Hayotda baxt puldamas ekan, Biz tanlagan yo'ldamas ekan, Ayro dilni tilmasdan tikan Uyga ketgim kelyapti Ona. Sizni ko'rgim kelyapti Ona! Iftxor