Bütün günü işdə uşaqlarla məşğul olub yorulsa da öz qızına da ayırmağa vaxt tapırdı. Ataməli Musaoğlu bəlkə də yorğunluğunu belə rəqs etməklə, qızı ilə əyləncəli vaxt keçirməklə çıxarırdı. Elə qızı Gülün 2 yaşında lentə alınan bu görüntülər də onun qızına sevgisinin nişanəsidir.
1995-ci ildə Lökbatanda dünyaya gələn Ataməli Musaoğlu 288 saylı Qaradağ Lökbatan tam orta məktəbində təhsil alıb. Daha sonra 680 balla daxil olduğu BDU-nun psixologiya fakültəsini bitirib.
Ali təhsili başa vurandan sonra vətənə borcunu ödəmək üçün hərbi xidmətə yollanan Ataməli qayıtdıqdan sonra öz ixtisası üzrə işləməyə başlayır.
Eyni zamanda, Xəzər Universitetinin kliniki psixologiya magistr fakültəsində dövlət sifarişi ilə ingilis dilində tədris alır.
Ataməli Musaoğlunun arzuları, ümidləri vardı. Ən böyük arzusu isə təhsil aldığı ixtisası üzrə, elə həmin ali məktəbdə işləmək idi. Tələbə yoldaşına göndərdiyi o səs yazısındakı həyat eşqi, ixtisasına bağlılıq çox aydın sezilir.
Atası bənna olsa da vətənə layiqli, ürəyi vətən sevgisi ilə döyünən bir oğul yetişdirmişdi. Elə o Vətən sevgisi Ataməlinin bütün arzularından, xəyallarından ayırdı. Sonuncu kursda olsa da Vətəni ali təhsilindən, karyerasından, çalışdığı mərkəzdəki onlarla azyaşlı şagirdlərindən, 2 yaşlı körpəsindən və canından üstün tutur.
Sentyabrın 27-dən başlayan döyüşlərə könüllü qatılmaq üçün müraciət etdi. Sentyabrın 28-də aparmasalar da onun sabahısı Atəməli öz arzusuna çatır. Ayın 29-u o könüllü olaraq döyüşlərə qatılır. Getməzdən öncə hamıdan halallıq almağı da unutmur. Öz yoldaşları ilə zarafatı isə onun döyüşlərə necə ruh yüksəkliyi ilə qatıldığını göstərir.
Ataməli Musaoğlu oktyabrın 15-də Ağdərə uğrunda gedən döyüşlərdə qəhrəmancasına şəhid olur.
Onun ailəsinə göndərdiyi sonuncu əmanət isə son nəfəsində barmağından çıxararaq döyüş yoldaşı ilə göndərdiyi nişan üzüyü olur.
İndi iki yaşlı qızı Gül bundan sonra daha da məğrur, başı dik gəzəcək. Atasının ona qoyduğu “Şəhid qızı” adı onu daha da qürurlandıracaq. Çünki atası üç rəngli şanlı bayrağımızın vətənimizin hər qarışında dalğalanması üçün canını fəda etdi. Həm də heç nəyi düşünmədən.
RUHUNA BÖYÜK SAYĞI İLƏ...
Rəsmi facebook səhifəmiz: / bel%c9%99-bir-hadis%c9...
7 окт 2024
