في شهر واحد صورت ونشرت ٤ فلوقات و الآن وصلت الفلوق الخامس يا جماعة! مازلت أتعلم و أجرب ومبسوط بالتصوير و المونتاج وتفاعلكم مع ما أنشر. في هالفلوق طبخت ذبيحة كاملة للشباب وكانت طبخة ناجحة بشكل كبير. الطبخ كان على حرارة ٤٠٠ درجة فهرنهايت ولمدة ٥ ساعات، ودي لو إني خليتها في الفرن ساعة زيادة حتى تكون اللحمة ذايبة لكن عشانا كان يوم أحد وبنصبح على يوم دوام والساعة كانت قريبة من ١١م. يعني لو خليتها زيادة كان ما تعشينا إلا بعد الساعة ١٢ص وهذا صعب على صاحب البيت الي استضافنا وصعب على الشباب.
بعض فروع كوسكو في مقاطعتنا يبيعون ذبيحة كاملة حلال (فرعي ريتشموند و سيري) ولي مدة أبي أضبطها للشباب فكتب الله ذاك اليوم إننا نجتمع ونضبطها. الجمعة مع الناس الطيبة من متع الحياة فحبيت تعيشون معنا جزء من حياتنا في مدينة فانكوفر لما نجتمع. تقريباً في كل مجموعة يكون فيها على الأقل واحد يعرف يطبخ، وكان عندنا أخوي عبدالله الصايغ الي (يحوف) ألذ الكبسات. رجع للسعودية الله يوفقه فكان دوري إني أخرج الطباخ الذي بداخلي لكن بطريقة مختلفة عن الي عودهم عليها أخوي عبدالله. البداية كانت ب(فخيذات) خروف ثم ضبطت لهم الخروف بكبره. ساعدني في الطبخ و التصوير أخوي المهندس هاشم مقيبل الي يدرس دكتوراه في جامعة اليو بي سي و تقدرون تشوفون لقطاته الحلوه للخروف.
تفاعلكم يشجعني أكثر للاستمرار في تصوير الفلوقات و تسعدني تعليقاتكم وملاحظاتكم. الفلوق الجاي بيكون عن يوم كندا الوطني الي احتفلنا فيه قبل أمس.
يسعدني أن يمتد تواصلنا إلى برامج أخرى:
/ kingalessa
/ kingalessa
/ kingalessa
قبل نشر هالفديو عدد المتابعين للقناة ٩١٧ أخ و أخت أعتز و أسعد بكم جميعاً.
27 авг 2024
