Isroil kuchlari G'azo bo'ylab hujumlarni tindirmayapti. Sektorda so'nggi sutkada kamida 40 nafar falastinlik jon bergan.
XAMAS AQShning urushni tugatishga qaratilgan sulh rejasining katta qismiga rozi bo'lganiga besh kun bo'ldi. Harakat vakillari Qatar va Misr vositachilik qilayotgan tinchlik muzokaralarida Isroildan javob kutayotganini bildirmoqda.
Sektorda joriy qurolli to'qnashuv to'qqiz oy avval - o'tgan yilning 7-oktabrida XAMASning 1200 nafar yahudiy o'limiga sabab bo'lgan hujumi ortidan boshlangan edi. Ayni damda G'azoda qurbonlar soni 38 193 kishiga yetgan. Qurbonlarning katta qismi bolalar va ayollar. Yaralanganlar soni 87 903 kishi.
7-iyul kuni minglab isroilliklar Bosh vazir Benyamin Netanyaxu qarorgohi oldida norozilik namoyishiga chiqdi. Ular G'azoda urushni zudlik bilan to'xtatish, XAMAS garovida qolayotgan fuqarolarni ozod etish va Netanyaxuning iste'fosini talab qilib namoyishlarni davom ettirmoqda.
6 окт 2024