Հայ ժողովրդական «Վանքի բոլորը» պարերգն է՝ «Զարթոնք» անսամբլի կատարմամբ: Անսամբլի յութուբյան ալիքում, որպես երգի հեղինակ, նշված է Մուրադ Մշեցու անունը: Երգը Մուրադի և Նուբարի սիրո մասին է: Մուրադենց տունը հավանաբար կանաչ դաշտի մեջ վեր հառնող վանքի կողքին է, որտեղով հաճախ անցնում է Նուբարը՝ տակնուվրա անելով սիրահար տղայի սիրտը: Նա երազում է, որ մի օր էլ Նուբարն այդ կողմերով անցնելիս իրենց տուն գա, դառնա իրենց տան սյունը, ինքն էլ տանիքի նման պաշտպան լինի նրան:
Կրկներգում տղան տարակուսանք է հայտնում, որ երբեմն, երբ հնարավոր է լինում հանդիպել, թվում է, թե երկուսն էլ պիտի ուրախանային միմյանց կողքին լինելով, սակայն, երբ ինքն ուրախությունից ծիծաղում է, Նուբարն արտասվում է: Երբ դրանից հետո ինքն էլ է տխրում, այժմ էլ աղջիկն է սկսում ծիծաղել. ինչ-որ բան խանգարում է նրանց միասին ուրախանալ ու ծիծաղել:
Այս տրամադրության պատճառը բացահայտվում է հաջորդ քառատողերում. պարզվում է՝ աղջկա մայրն ուրիշ տղայի է աչքի տակ առել որպես փեսացու իր դստեր համար, սակայն Մուրադը հույս ունի, որ Նուբարի հայրը դստեր ձեռքն իրեն կտա: Եվ սկսում է սպառնալ, թե՝ «տես քո մոր հալը, ես այլևս համբերել չեմ կարող նրա խարդավանքներին»: Իսկ այդ խոսքով Մուրադը ոչ թե մի վատություն է անելու Նուբարի մորը, այլ ինքն իրեն խոստանում է ամեն գնով հասնել իր բաղձանքին և ամուսնանալ Նուբարի հետ, որքան էլ նրա մայրը դեմ կանգնի: Ինչպես երևում է, Նուբարը ևս Մուրադին է սիրում, քանի որ, կրկնելով Մուրադի վերջին խոսքը, ասում է. «Մուրադը չլինես, թե չառնես ինձ»:
Երգի խոսքերը՝
Վանքի բոլորը չայիր-չիման է,
Քու գալը մեր տուն սեր ու մերան է,
Սեր ու մերան է քու գալը մեր տուն,
Ես տանիք դառնամ, դու էլ դառնաս սուն:
Կը լացիմ՝ կը խնդա, կը խնդամ՝ կուլա,
Մեկ արև, մեկ անձրև, մեկ ամպի քուլա:
Հերը ինձ կը տա, էն տըղին չի տա,
Խենթ խելառ յարն էլ, ա՜խ, էրկու միտք ա,
Ախ էրկու միտք ա, էս խանդոտ յարն էլ,
Մոր փեշի տակն է, կըտրել է ճարը:
Կը լացիմ՝ կը խնդա, կը խնդամ՝ կուլա,
Մեկ արև, մեկ անձրև, մեկ ամպի քուլա:
Կապեմ իմ գոտին, առնեմ իմ խանչալ,
Ես քո հոր ղուրբան, տես դու քո մոր հալ,
Տես դու քո մոր հալ, կտրել է իմ ճար,
Ես Մուրադ չէղնիմ, թե չառնիմ Նուբար:
Դու Մուրադ չէղնիս, թե չառնիս Նուբար:
Կը լացիմ՝ կը խնդա, կը խնդամ՝ կուլա,
Մեկ արև, մեկ անձրև, մեկ ամպի քուլա:
չայիր-չիման - խոտավետ տեղ
2 мар 2021