David Zarmawia Sumo Aizawl to Mamit Written by:- Benjamin Lalrinawma Aizawl atanga Mamit i kal dawn chuan he Sumo chanchin ka sawi turah hian i mawng han hung ve ngei ang che. Mamit atanga Aizawl haw tuma ka in buatsaih mek lai chuan ka rilru in khawi sumo ah nge ticket ka lak ang aw tiin ka in ngaihtuah ngut ngut a. Chumi lai tak chuan tun hma kum thum vel ral ta a an sawi lar em em, Awithang Sumo ngei mai kha chuan ka duh ta ngawih ngawih a. Tichuan le, chawhnu lama chhuak tur ka nih avangin theihpalingkawh hian ka in uluk ve em em a. Ka inbual fai vang a, nalh thei ang berin ka inchei nasa mai bawk a. Dar 12 pm vel ah chuan ka ticket hauhna ngei mai Sumo chuan a hmehrik (horn) ka thlenna in bulah chuan a lo hmet tuar tuar mai a. Rang zetin ka rucksack ka la chhuak a, sumo lam chu ka pan nghal mai a. Awi ka rei leh! Ka ring theilo, ka zuam mawlh lo hetiang sumo țawng lutuk leh bal lutuk hi engtin nge a nih theih ka va awih lo ve. Counter lam hian an tisual a ni ngei ang ka ti rilru a. A driver lah chu hetia en mai chuan rinna pakhat pawh hi ka neilo hrim hrim. Feet nga (5) hnuai lamah hrî leng sela chuan ngaihtuah awm khawpa pa sâng lo leh lian lo ve tak a ni. Snake in the Eagle shadow tih movie a kungfu Master te kha ka hrechhuak rum rum a. A sam te reng reng chu thlawh loh chûl ang maiin, a hnim em em bawk si, a khabe hmul te leh a hmuihmul te chu Savdhan India atanga a kharchhawn tih hriat reng reng. A rin hian ka ring thei hlawl lo. Chutah rang lutuk in motor chhung atang chuan a lo chhuak a, ka luhna tur sumo number 6 kawngkhar chu mi han hawn sak nghal zung zung a. Ka luh rualin vaivut in min bawh nghal pang mai a, awi! In chei leh in tihfai in awmzia a va nei thui lo em em ve ka ti rilru a. A khar leh lam chu idea hman ngai tak a lo ni a, khar satliah mai zawng thil awlai zawng a ni lo. Theihtawp chhuah tak meuh va chawi chhoh paha khar ngai a lo ni a, experience nei tawh tan lo chuan khar ve tum ringawt chi pawh a ni lo. Awi ! Ava ropui lo em ti chungin Aizawl chu kan pan dawn ta a lawm mawle. Passenger lah chu khêl lovin a ngheilo an la ti deuh deuh. Passengers dang kan lam kual zel a, Dr. Reubena (Zaithiam) te lai lai chu an lo ni, officer pali thawt kan lam leh zui bawk a. Mak hi ka ti angreng khawpa, he motor chhiat teh reng nen hian engtin nge an lo chuan duh aw ka ti rum rum a. Mamit chhuahsan tura kan in warm up vel mek lai chuan a motor chu a nung thei ta reng reng lo mai a. Driver chu a gear bul ah a zuk kun ngar ngar a, eng emawni a dap dap a, screw driver sei zet mai chu a kut dinglam in a keng bawk a. Tichuan wire tamzet chu a hmeh kawpa, tichuan a screw driver ken chuan a sumo switch ah chuan a han herh pawpa, ring zetin a nung hlarh hlarh ve nghal mai bawk a. Kan va lawmpui hlawm tehreng em. A motor tih nun dan chauh a la ni hleinem, a gear leaver te chu e, sawi hian a siak awm love. A tawi a, tawi mangkheng, handling na tur pawh awm tawh lo khawpa modify ve tawh. Gear thlak dawn pawh a kûn fê ngai, khawilai hi nge number one ni anga, khawi hi nge two, three, reverse ni ang tih reng reng a hriat theih loh. Kei sumo gold leh motor chi hrang hrang lo tuai ve tawh pawhin a gear awmdan kha ka man pha tawp lo ve. Mahse kan driver chuan a hnehsawh em em lawi si. Mamit khaw piah lawk Dampui ah thingpui in a kan chawlh dawnin a sumo chu ati ding dawn ta lawm mawle, brake kha theihtawp hian First gear nen a tang kawpin a tlawh ngar ngar a, tichuan bazar shed step remchang ah chuan a ke dinglam chu a zuk nghat thei hram a, kan ding ve mai. Driver chu hlauhthawnna leh enghlelh nei map lo hian a hlimin, a nui reng thei tho si. Mak kan ti tlang em em vek a ni. Aizawl atanga al o chhuk lamin a motor fare dawn zawng zawng cheng 2500 pawh alo tibo vek mai a. Mahse kan hriatah leh kan hmuh ah khan lungngai, hlimlo hmel a pu duh hauh lo thung. Tichuan kan tlan ve zel a, kan driver chuan tunlai politics chu mi tamtak buaipui, mi tlemte hlawkna anih thute, Egypt ram a sumdawng leh cab driver ho fin phakar zia leh an duhãm ziate, RU-vid tangkai zia leh a hmuchhuaktu te nen lam min hrilh zel a. Tunlai super bike changkang tak tak Aizawl tlangval thawhchhuah neilo, chhungte chawmhlawm in a an neih nasat zia leh maintenance a an buai thin ziate chu a tawn atang leh a hmuh ve te atangin min hrilh ve hlawm hlawm mawlh mawlh a. Rin ai takin a ti ti te reng reng chu rual a pawl phian reuh va, passenger doctor leh officer thenkhatte pawhin an chhan theihloh indian film industry a thawh hlawk tak tak leh a changtu te nen lam min hrilh nasa mai. He driver tlawmngaih dan leh in ngaihtlawm dan chu a awmdan leh chezia ah alang thei a. Mi va be suam suam leh ti deuh chhen lo mahse, a mizia ah hriat theih hian a awm ve tawp ti ila ka sawi sual awm love. Chuvang aniang a, Mamit leh Aizawl inkar service sumo ah chuan a luck ber a, fur khawchhiat vang lai pawhin a sumo chu țawng hle mahse, an chuan duhna ber anih tlat ni tiin ka ngaihtuah hial a ni. Engangin he sumo hi chhe ve hle mahse, a control tu berin a zir em avangin duhsak a hlawh em em a, passenger waiting list bu hial siam angai ni awmin an sawi bawk thin. Rawpuichhip kan thleng a, Benjamin Hotel, ka hmingpui hotel kher ah chuan kan chawl a, thil ka ei zawh a, ei man ka pek chuan, a nghaktu nu chuan David Zarmawia Sumo ah i chuang bawk a, ka lo discount ang che ati a, pawisa tlem te chawi ni siin, tamtak ka ei thung. Kan driver hi politician pawh a ni tawp si lova, an va ngaisang em em ve tiin ka ngaihtuah neuh neuh lai chuan, ka chuanpui Dr. Reuben chuan a fel zia leh a tlawmngaih zia min hrilh mawlh mawlh a. Motor danga chuan pawh a duh loh thu te nen lam min hrilh zel tak ah chuan thil awmdan chu ka man thei mai a. Thil ti thei leh milar ni lo mahse, a tlawmngaihna leh a in ngaihtlawmna leh a felna a vanga ngaisang an lo ni tih hi. Kilometres 90 lai chu chuang mah ila, chu driver bula awm chu kan kham lo tlang hle a, a ti ti thenkhat te phei chuan min ti nui nasa hle hlawm ani. Kum 4 vel ral ta ah khan Dâpchhuah chhak lawk ah LPK Tripper leh Bike kawngkawi ulh laiah an in tawk thut a, LPK Driver phu lutuk in kawngko a sû a, chu LPK driver chuan Bike khalhtu chu tihsual nei hauhlo kha cheng 1500 a chawi tir ve ngawt thute a sawi phei chuan kan nui tawp thei lawk lo. Bike khalhtu dawih zia leh motor vehicle act a hriat loh zia uar fahrana a sawi lai phei chuan mittui tla hialin kan nui ham ham zuk nia mawle. Țumkhat leh pawh Sairang bul lawk ah a sumo tlan lai kawngkawi ah tak 407 motor in a over take ve ngawt pek a. Scooter select II 1990s model niawm tak, a khalhtu in kawr pakhat pawh ha lo leh, helmet pawh khum hauh lova Aizawl lam atanga rawn tlan thla nen chuan chu 407 chu an in su ta lawm mawle. Scooter khalhtu hian document, helmet khumlo leh kawr ha lo chung pawhin thiam chan a tum ruh ve nasa a ni awm a. 407 driver nise duai bik lo, scooter khalh tu in dan a bawhchhiat ve tho avang te pawh aniang an pawr dunin, an sa dun hle aniang. Police an kova chal rem ngaihna pawh an hriat bik loh thu leh in hrethiam tawn tawp tura an tih thu a sawi lai te kha mithla ah a cham reng mai dawn anih hi.. Zantir dar 6:30 pm velah Lêngpui pêng kan thleng a. Chutia kan nuih ham ham lai tak chuan motor chu a ti ding zawk a. Hnuai lama wire in zam nei nuai chu a zuk dap leh rawk rawk a, tichuan head light chu eng pawp han ti dawn ila eng chiah silo hian alo êng ve da da a. A veilam light man chu Rs 170 man a ni a, a êng teh chiam lo. A dinglam light erawh 350 anih avangin en pawh a engtha phian reuh va. Anihna takah chuan a sumo hi wire in zam tamtak khan a ti kalin, hna a thawh tir ni berin ka hria. Ka theihnghilh pakhat a la awm pek; sumo hi switch off dawn chuan a steering hnuai lamah hrui sei vak lo pawh zeuh angai a. Chu erawh chu thil harsa lutuk zawng a ni lo. Engkim kha company siam sa aiin a rintlak lohna pakhat mah a awm lova, a khalhtu berin a hnehsawh em em vek tho va, kan thlamuang em em a ni. David Zarmawia sumo hi Awithang tih hmingpu tho mahse a motor ah chuan a ziak avlang thei tawh chuang lova, a lang zawng chu; mamit tih leh, a motor registration number tlem a zawng a ni mai. Fur khawchhiat vang lai chuan a motor chung chu tui a far theih avangin nihliap keng tel turin a passenger te a hrilh mawlh mawlh thin a ni awm e. Vawi engemaw zat vairam leh zoram dung leh vâng ah hian lo zin kual ve tawh mah ilangin, he sumo leh a driver chanchin ang em em a, min hneh leh min ti lawmtu hi ka tawng ngai lova. A chanchin ziak lo thei hian ka mawi mawlh lo abni ka ti ve tlat. He sumo ah ngei hian mamit ah i kal dawn chuan lo chuang ve ngei ang che tiin ka ti tawp mai ang e.
