*പാട്ടും, ആരവവും തീർത്തു ബഡ്സ് സ്കൂൾ പ്രവേശനോത്സവം.* മലപ്പുറം: നഗരസഭയുടെ പേൾസ് ബഡ്സ് സ്കൂളിൽ പ്രവേശനോത്സവം വിവിധ കലാപരിപാടികളുടെ സാന്നിധ്യത്തിൽ നടന്നു. പുതുതായി പ്രവേശനം നേടിയ വിദ്യാർത്ഥിക്ക് തലയിൽ കിരീടം അണിയിച്ച് പ്രവേശനോത്സവം നഗരസഭ ചെയർമാൻ മുജീബ് കാടേരി ഉദ്ഘാടനം ചെയ്തു. സമൂഹത്തിലെ പാർശ്വവൽകൃത വിദ്യാർത്ഥികൾ പഠിക്കുന്ന ബഡ്സ് സ്കൂളിന് ഉയർന്ന പരിഗണനയും, മികച്ച പശ്ചാത്തല സൗകര്യങ്ങളുമാണ് നഗരസഭ തയ്യാറാക്കിയത് എന്ന് ചെയർമാൻ മുജീബ് കാടേരി പ്രസ്താവിച്ചു. ബഡ്സ് സ്കൂൾ പ്രവേശനോത്സവം ഉദ്ഘാടനം ചെയ്യുകയായിരുന്നു അദ്ദേഹം. ആധുനിക സൗകര്യങ്ങളോടുകൂടിയ സ്മാർട്ട് ബഡ്സ് പദ്ധതി നടപ്പിലാക്കി എയർകണ്ടീഷണർ സൗകര്യത്തോടുകൂടിയ ക്ലാസ് റൂമുകളും, ലാബുകളും ഉൾപ്പെടെ മികച്ച പശ്ചാത്തല സൗകര്യങ്ങളാണ് നഗരസഭ നിർമിച്ചു നൽകിയത്. മാനസിക വൈകല്യം നേരിടുന്ന വിദ്യാർത്ഥികളുടെ രക്ഷിതാക്കൾക്ക് തൊഴിൽ പരിശീലനം ഉൾപ്പെടെ നൽകുന്ന ബഡ്സ് റിഹാബിലിറ്റേഷൻ സെൻററും നഗരസഭ ബഡ്സ് സ്കൂളിന് അനുബന്ധിച്ച് തുടക്കം കുറിക്കുമെന്ന് അദ്ദേഹം പറഞ്ഞു. ബഡ്സ് റിഹാബിലിറ്റേഷൻ സെന്ററിന്റെ നിർമ്മാണത്തിന് ആദ്യഘട്ടമായി നഗരസഭ നീക്കിവെച്ച മുപ്പത് ലക്ഷം രൂപയുടെ നിർമ്മാണ പ്രവർത്തനങ്ങൾ ഉടൻ ആരംഭിക്കും. അടിസ്ഥാന സൗകര്യങ്ങളുടെയും, നിലവാരത്തിന്റെയും കാര്യത്തിൽ മികച്ച സ്ഥാപനമായി ബഡ്സ് സ്കൂളിനെ മാറ്റുമെന്നും അദ്ദേഹം പറഞ്ഞു. ചടങ്ങിൽ നഗരസഭ കൗൺസിലർ ഷാഫി മൂഴിക്കൽ അധ്യക്ഷനായി. സ്റ്റാൻഡിങ് കമ്മിറ്റി ചെയർമാൻമാരായ മറിയുമ്മ ശരീഫ്,പരി അബ്ദുൽ ഹമീദ്, അഡ്വ: റിനിഷ റഫീഖ്, ഹെഡ്മിസ്ട്രസ് നജീബ ടീച്ചർ തുടങ്ങിയവർ പ്രസംഗിച്ചു.
