جو علمدار تھا اس کا وہ حشم لے کے چلو قافلہ حق کا ہے تیار علم لے کے چلو آؤ عباس سے سیکھیں کہ وجاہت کیا ہے حق پہ آنچ آۓ تو پھر حکمِ شریعت کیا ہے جو تَرائی میں ادا کی وہ عبادت کیا ہے یہ عبادت یہ تََمُّل یہ کرم لے کے چلو اُن کی پیرو ہو تو پھر سید و سردار بنو آگ سینوں میں لیے شعلہ بیدار بنو ذوالفقارِ اسد اللہَ کا کردار بنو حق پہ آنچ آۓ تو پھر تیغِ دو دم لے کے چلو اب بھی پیغامِ وفا حق کی قَسم زندہ ہے اب بھی پیاسوں کا وہی جاہ و حشم زندہ ہے سازِشیں مرگئیں مظلوم کا غم زندہ ہے ساری دنیا میں یہ مظلوم کا غم لے کے چلو خاک اور خون میں اٹتا ہے یہ چہرہ تو اٹے سر جو کٹنا ہے رہِ حق میں تو پھر سر بھی کَٹے جب ہو مقتل میں کڑا وقت تو پیچھے نہ ہٹے وہ جو بڑھتا رہے آگے وہ قدم لے کے چلو نصرتِ حق میں جو حُر آئے تو تعظیم کرو جن سے زندہ ہے وفا اُن کی بھی تکریم کرو اپنے لفظوں میں بھی باطل کو نہ تسلیم کرو اپنے لہجے میں بھی تردیدِ ستم لے کے چلو تم حسینی ہو تمہیں پاسِ وفا رکھنا ہے پیشِ معبود تمہیں دستِ دعا رکھنا ہے آنسوؤں میں جو دیا ہے وہ جلا رکھنا ہے اِنہی اشکوں کی قَسَم دیدہِ نم لے کے چلو بعدِ شبیر جو زینب نے لیا صبر سے کام ہم کو کرنا ہے اُسی مقصدِ مظلوم کو عام گوشے گوشے میں پہنچ جائے اسیروں کا پیام جا بجا تذکرہِ اہلِ حرم لے کے چلو ہائے وہ چھوٹا سا لشکر وہ غریب الغُرَبا عصرِ عاشور تلک ان میں سے کوئی نہ بچا بھول سکتے نہیں اِس کرب کو ہم اہلِ عزا دل میں یہ سوگ یہی رنج و اَلَم لے کے چلو تم کو لکھنا ہے جو روداد وفاؤں کی ہلال ان کی روداد لکھو جن کو نہ آئے گا زوال اپنے نوحے میں رہے تم کو شہیدوں کا خیال نوحہ جو خون سے لکھے وہ قلم لے کے چلو