НОДИДА МЕГИРӢ
Нигоро, сӯзиши ҷони маро нодида мегирӣ,
Дили аз ишқ бирёни маро нодида мегирӣ.
Зи сӯзи дил бирезад ашки чашмонам ба ёди ту,
Валекин ашки сӯзони маро нодида мегирӣ.
Туро аз ҷону дил пайваста пазмон мешавам, аммо
Ту ҷоно, ҷони пазмони маро нодида мегирӣ.
Парешонтар зи гесуи сиёҳат ҳаст ҳоли ман,
Чаро ҳоли парешони маро нодида мегирӣ?
Бароят эй ғазалгуфтор, шоир гашт Кӯҳзодат,
Вале ту шеъру дастони маро нодида мегирӣ.
Кӯҳзод Фатҳулло
25.04.2020
11 июн 2024