Биир үйэ - оҕону сырдыкка, кэрэҕэ угуйан кэлбит икки Советскай Союз Геройдаах Бүлүү улууһун Балаҕаччы нэһилиэгин орто оскуолата үбүлүөйүн бэлиэтиир дьоһун күнүгэр чугастан-ыраахтан элбэх киһи былырыын үлэҕэ киирбит таас оскуолаҕа муһунна.
Араас сылларга оскуоланы бүтэрбит, оскуолаҕа үлэлээбиттэр парадтаан киирэн истиҥ сыhыан чааһын бэйэ-бэйэлэригэр бэлэхтээтилэр, олох киэҥ аартыгар такайан таһаарбыт оскуолаҕа, учууталларга барҕа махтал этилиннэ. Мастаах түөлбэтин ыччатын түмпүт оскуола бу сыллар тухары 2000 кэриҥэ оҕону үөрэтэн таһаарда. Аҥардас юбилей эрэ буолбакка инники былааннар, баҕа санаалар икки күннээх тэрээhиннэр усталарыгар этилиннилэр.
Үбүлүөйгэ анаан «Олох, үөрэх аартыга - Мастаах оскуолата» дьоһун кинигэ күн сирин көрдө. Кинигэҕэ сүүс сыллаах оскуола былыргыта, бэҕэһээҥҥитэ, бүгүҥҥүтэ толору сырдатылынна диэн кинигэ сүрэхтэниитигэр сылдьыбыттар этиннилэр. Буруолуу сылдьар кинигэлэри сүрэхтээhин олохтоох мелодист, сцена ветерана Афанасий Степанов саҥа тахсыбыт ырыанньыгын билиһиннэрииннэн түмүктэннэ.
Үөрэппит учууталларыгар үөрэнээччилэрэ туох-ханнык үлэһит дьон буолан сылдьалларын тото-хана кэпсээтилэр, чиэстээтилэр, махтаннылар.
Саха ыччата үөрэхтээх буоларыгар Мастаах түөлбэтин киинэ - Балаҕаччы оскуолата сүүс сыллаах суола-ииһэ сүтэн-оһон хаалбакка өссө күүскэ, өссө чиҥник, хорутуулаахтык салҕаныа диэн бигэ эрэллээх тарҕастыбыт.
26 мар 2015
