САТМҰХАМБЕТОВТАР ЖАНҰЯСЫНЫҢ ШЫҒАРМАШЫЛЫҚ КЕШІ
18 тамыз күні ауданымызға танымал өнерлі отбасы Сатмұхамбетовтар әулетінің "ЖАНҰЯ - ЖАННЫҢ ШУАҒЫ" атты шығармашылық кеші өтті. Өмірде де, өнерде де қол ұстасып келе жатқан Қанат пен Гүлмира Сатмұхамбетовтардың елу жасқа толуына арналған концерт жоғары деңгейде өтіп, жерлестерінің қошеметіне бөленді. Талантты жұп мерейтойларына орай, ауданымыздың өнері мен мәдениетінің дамуына қосқан еселі еңбегі үшін "Абырой" төсбелгісімен марапатталса, Абай облысының мәдениет, тілдерді дамыту және архив ісі басқармасынан А.Ш.Кикбаев облыс әкімі орынбасарының марапатын тапсырды.
Концерттік бағдарламада кеш иелерімен бірге Үржар аудандық мәдениет үйінің "Көңіл толқыны" халық аспаптар оркестрі, "Скиф" вокалды-аспаптық ансамблі, "Ғұмыр" тобы, "Сонар" және "Наз" би ансамбльдері, Нұрбол Черубаев, Дарын Шаяхметов, Дана Аймұхамбетова, Райгүл Чүкенова сынды әншілері өнер көрсетті.
Сатмұхамбетовтар жанұясының балалары Еркежан, Аяжан, Ибраһим, Ислам, Жанайымның орындауындағы "Әке-ана", "Жанайым", "Жанұя -жанның шуағы" әндерін тыңдағанда жүрегі елжіремеген көрермен қалмады. Кеште көбінесе
Қанат Сатмұхамбетовтің әндері орындалды. Бүгінгі таңда 15-тей әннің авторы Қанат Қасымұлының "Үржарым-аманат", "Ұлпа сезім", "Қара майор", "Қыз бақыты" , "Сұлусыңдар арулары, Үржардың", ",Анаға арнау", "Жанайым", "Жанұя-жанның шуағы" әндері шырқалды. Қанат пен Гүлмираның өнеріне тәнті болдық, әдемі әндерінен әсер алдық, абыройына сүйсіндік.
Мерейлеріңіз үстем болсын мерейтой иелері!
Шығармашылық шабыт, өнерде ұзақ ғұмыр тілейміз!
13 дек 2023