ШЕЪРИ МУФАЗЗАЛИ АҶАМРОД
КОРНОМАИ ПЕШВО
Рўзи 29-октябри соли 2016 Асосгузори сулҳу Ваҳдати миллӣ, Пешвои миллат, Президенти муҳтарами Ҷумҳурии Тоҷикистон - Эмомалӣ Раҳмон савори рахши оҳантан маҷрои Вахшро баста, бо ин корномаи беназиру таърихии худ ба марҳилаи нави бунёди НБО-и Роғун оғоз бахшиданд.
****
Муаззам Пешвои миллати фархундафоли мо,
Пайи рушду камоли мо,
Пайи ободии кишвар,
Чароғистонии ҳар хонаву ҳар дар,
Сарафрозии ҳар тоҷик андар арсаи гетӣ,
Пайи ҷоҳу ҷалолу фарру шони безаволи мо.
Ба користони Роғун чун Таҳамтан корсоз омад,
Муборакрой Сарвар ҳомии аҳли ниёз омад.
Зи барқи маърифат саршор ин фарзонаи даврон,
Ватанро бештар то бинад ў пурнуру барқафшон,
Инони рахши оҳанпайкаре бигрифт бар дасташ,
Ба он дастони дар созандагии ин Ватан пайваста пайвасташ!
Даме бистуд Эзадро,
Ки, ай Ҷонофарин, имдод,
Барбандем ин садро!
Баландоҳанг аз девори Чин садди мусаддадро,
Ки Кохи нури миллат то шавад бунёд!
Зи зўри рахши оҳантан
Ва ҷўши ғайрати бебоктинат Рустами бонангу соҳибфан
Замини водии Вахшобу кўҳу бора меларзид,
Нагунсар сўи маҷро сахраҳои хора мелағзид…
Аз ин ҳангома рўди Вахш аз ҳар саркашӣ бигзашт,
Сари таслим пеш афканду аз дарёвашӣ бигзашт.
Ки ў дигар ба нафъи халқ хидматгор мегардад,
Зи баҳри Кохи нури тоҷик обанбор мегардад
Ва ҳар як қатра оби ноби ин Кавсар,
Чу нерўи зиёгустар,
Беҳ аз хирвори симу зар,
Ба суди кор мегардад,
Ватан гулзор мегардад!
Барўмандона дарёро чу баст ин марди равшандил,
Ба хоки тира яксон гашт он андешаи ботил,
Ки: тоҷик Кохи нури хештан бунёд натвонад.
На!
Ин Сарвар кунад коре, ки сад Фарҳод натвонад!
Зиҳӣ, ай нусратойин Пешвои миллати тоҷик,
Нигаҳбонат Худо бошад барои миллати тоҷик!
01.11.2016
5 окт 2024
